Um bókasafnið

Hlutverk bókasafns og upplýsingaþjónustu HR (BUHR) er að styðja og efla sköpun og miðlun þekkingar við Háskólann í Reykjavík með því að safna efni á fræðasviðum skólans, gera það aðgengilegt og veita notendum safnsins góða þjónustu. Nánar um safnkost BUHR.

Þjónusta er kjarninn í starfsemi BUHR. Þjónustan er einkum ætluð nemendum og starfsfólki Háskólans í Reykjavík. Öllum er þó velkomið að heimsækja safnið á auglýstum afgreiðslutíma og nýta sér þjónustuna og safnkostinn. Alla virka daga er upplýsingafræðingur á vakt til að aðstoða HR-inga við heimildavinnu. Hægt er að panta tíma eða líta við á auglýstum afgreiðslutíma.

Fræðsla er mikilvægur þáttur í þjónustu safnsins og miðar að því að efla með notendum færni í upplýsingalæsi, þ.e. að finna, nota og meta upplýsingar með faglegum og ábyrgum hætti. Áhersla er lögð á aðgang að gögnum á rafrænu formi og er stefnt að því að stúdentar og starfsmenn HR hafi aðgang að rafrænu efni á sínum fræðasviðum sambærilegan við það sem best gerist í alþjóðlegu háskólasamfélagi. Nánar um fræðslu BUHR.

Samstarf um rafræna miðlun safnkosts er BUHR mikilvægt. BUHR er áskrifandi að bókasafnskerfinu á Leitir.is. Leitir er samskrárkerfi íslenskra bókasafna og upplýsingamiðstöðva. Landskerfi bókasafna sér um rekstur kerfisins, en starfsmenn BUHR reyna að leggja sitt af mörkum til áframhaldandi þróunar kerfisins og innleiðingar nýjunga sé leitað til þeirra um slíkt. Annað mikilvægt samstarfsverkefni er Landsaðgangur að rafrænum gagnasöfnum og tímaritum Hvar.is. Landsbókasafn Íslands hefur umsjón með verkefninu samkvæmt þjónustusamningi við mennta- og menningarmálaráðuneytið. Forstöðumaður BUHR situr í Stjórnarnefnd landsaðgangs sem er Landsbókasafni til ráðgjafar. Loks má nefna þátttöku BUHR í Skemman.is, rafrænu varðveislusafni lokaritgerða íslenskra háskólastúdenta, frá 2010.