Þeir sem stóðu vaktina eigi allir að víkja
Stefán Einar Stefánsson, viðskiptasiðfræðingur við lagadeild Háskólans í Reykjavík, sagði í samtali við Stöð 2 í kvöld að allir þeir sem átt hefðu sæti í ríkisstjórn í aðdraganda efnahagshrunsins og sætu nú áfram í ríkisstjórn eða á þingi ættu að axla ábyrgð.
Til að vinna traust almennings að nýju væri eðlilegast fyrir þau að stíga til hliðar.
Þeir sem áttu sæti í ríkisstjórn á umræddum tíma og eru enn ýmist þingmenn eða ráðherrar eru: Einar K. Guðfinnsson, Guðlaugur Þór Þórðarson, Jóhanna Sigurðardóttir, Kristján L. Möller, Þórunn Sveinbjarnardóttir og Össur Skarphéðinsson.
Þorgerður K. Gunnarsdóttir sat einnig í umræddri ríkisstjórn en hún lýsti því sem kunnugt er yfir um helgina að hún hygðist fara í tímabundið leyfi sem þingmaður. Áður hafði Björgvin G. Sigurðsson lýst því sama yfir sem og Illugi Gunnarsson.
Viðtalið við Stefán má finna hér.
