Fréttir eftir árum


Fréttir

MH vann Boxið 2016

13.11.2016

Það var lið Menntaskólans við Hamrahlíð sem vann Boxið – framkvæmdakeppni framhaldsskólanna í ár, eftir harða keppni. Átta lið frá jafnmörgum framhaldsskólum kepptu til úrslita í gær, laugardag, í Háskólanum í Reykjavík.

Lið Kvennaskólans Í Reykjavík varð í öðru sæti og lið Menntaskólans í Reykjavík í því þriðja. Boxið felst í því að leysa fjölbreyttar þrautir sem reyna á verklega og bóklega þekkingu, hugvit og verklag þátttakenda. Liðin fara í gegn um þrautabraut með átta þrautum sem eru sérhannaðar af sérfræðingum fyrirtækja úr ólíkum greinum iðnaðarins með aðstoð fræðimanna HR.

Egg-buid-undir-fallMeðal þeirra þrauta sem liðin glímdu við að þessu sinni var að verja egg fyrir falli úr þriggja metra hæð, byggja líkan af námuskipi úr tölvuleiknum EVE Online, smíða líkan af þrívíddarbyggingu prótíns og koma með hugmynd að nýrri matvöru. Liðin fóru á milli stöðva og fengu hálftíma til að leysa hverja þraut. Fyrirtækin sem lögðu þrautir fyrir nemendurna í ár voru: CCP, ÍAV, Marel, Matís, ORF Líftækni, Orkuvirki, Trefjar og Verkís.

Forkeppni fyrir Boxið var haldin í lok október og þá tóku 21 lið frá 13 skólum þátt. Átta lið komust áfram í aðalkeppnina. Það voru lið frá: Menntaskólanum við Hamrahlíð, Menntaskólanum í Reykjavík, Tækniskólanum, Kvennaskólanum í Reykjavík, Menntaskólanum að Laugarvatni, Fjölbrautaskólanum í Breiðholti, Menntaskólanum í Kópavogi og Fjölbrautaskóli Suðurlands.             
 
Þetta er í sjötta sinn sem Boxið er haldið. Að keppninni standa Samtök iðnaðarins, Háskólinn í Reykjavík og Samband íslenskra framhaldsskólanema. Markmið með Boxinu er að kynna og vekja áhuga nemenda í framhaldsskólum á verk- og tækninámi og fjölbreyttum störfum í iðnaði. Það var lið Menntaskólans á Akureyri sem sigraði í Boxinu í fyrra.

Mynd af liði MH í Boxinu sem sigraðiVinningsliðið skipuðu: Magdalena Guðrún Bryndísardóttir, Jessý Jónsdóttir, Ásmundur Jóhannsson, Unnar Ingi Sæmundarson og Ívar Dór Orrason. Hér eru þau ásamt Guðrúnu Hafsteinsdóttur, formanni SI og Ara Kristni Jónssyni, rektor HR.