Vel sótt samtal um dauðann
Fullt var út úr dyrum þegar Bragi Skúlason, sjúkrahúsprestur, hélt erindi sitt „Samtal um dauðann“ í Háskólanum í Reykjavík í hádeginu í dag.
Bragi lagði höfuðáherslu á nýjustu rannsóknir sínar, þar sem skoðað var hvort kynjamismunur sæist í sambandi við tal um eigin yfirvofandi dauða og hvort jákvæð örvun auki líkur á að deyjandi einstaklingar tjái sig um þetta viðkvæma efni, en Bragi hefur sl. ár unnið að rannsóknarverkefni um ekkla á Íslandi undir handleiðslu Ásgeirs R. Helgasonar.
Bragi ræddi ennfremur um sorgarviðbrögð, heilsutengda þætti og dánartíðni í samanburði við samanburðarhóp og hann velti upp spurningum á borð við það hvort deyjandi einstaklingar væru hræddir við dauðann og hvort þeir væru uppteknir af hugsunum um velferð sinna nánustu.
Bragi Skúlason hefur þjónað sem sjúkrahúsprestur á Landspítalanum frá 1989.
Fréttablaðið birti viðtal við Braga um rannsóknir hans og erindið í gær og hann var í viðtali á Bylgjan í bítið í morgun.
