Foreldrar eru meira með börnum sínum nú en áður
Umfangsmikil könnun Rannsóknar & greiningar við Háskólann í Reykjavík og menntamálaráðuneytisins, um líðan og hagi íslenskra skólabarna frá 10-16 ára, var kynnt á málþingi í dag. Margrét Lilja Guðmundsdóttir, aðjúnkt við kennslufræði- og lýðheilsudeild HR og Álfgeir Logi Kristjánsson, lektor við sömu deild, kynntu niðurstöður rannsóknarinnar en þær hafa verið gefnar út í tveimur viðamiklum skýrslum.
Á meðal athyglisverðustu niðurstaðna rannsóknarinnar má nefna að íslenskum börnum og unglingum virðist ekki líða verr eftir að kreppan skall á, miðað við líðan þeirra í sambærilegri könnun sem gerð var fyrir tveimur árum. Öðru nær, þeim líður jafnvel betur. Svo virðist sem foreldrum hafi tekist að halda vel utan um börnin sín á þessum óvissutímum, þeir verja meiri tíma með þeim og afleiðingarnar virðast m.a. vera að færri börnum líður illa og færri börn finna til einmanaleika.
