Ísland verður hluti af alþjóðlegum hugverkagrunni
Lagadeild Háskólans í Reykjavík, Félag um stafrænt frelsi á Íslandi (FSFÍ) og Creative Commons samtökin hafa undirritað samstarfssamning um þýðingu og aðlögun „almenns hugverkaréttar“ að íslensku lagaumhverfi. Þórður S. Gunnarsson, forseti lagadeildar HR og Tryggvi Björgvinsson, formaður FSFÍ, undirrituðu samning þessa efnis fyrir stuttu, en Tryggvi kynnti samstarfið á ráðstefnu sem félagið hélt í gær í Háskólanum í Reykjavík.
Creative Commons er alþjóðlegt verkefni sem var sett á laggirnar árið 2001 að tilstuðlan Lawrence Lessig, lagaprófessors við Stanford háskóla. Markmið Creative Commons er að skapa sameiginlegan, alþjóðlegan hugverkagrunn sem veitir öllum leyfi til að dreifa og nýta hugverk í sinni sköpun að uppfylltum skilyrðum sem virða óskir höfunda um nafngreiningu, dreifingarskilmála, notkunar í hagnaðarskyni og/eða afleidd verk. Árið 2008 var áætlað að sameiginlegi hugverkagrunnurinn hafi innihaldið 130 milljónir verka, þar á meðal fjölda ljósmynda á vefsíðunni Flickr og allar greinar frjálsa alfræðiritsins Wikipedia.
Nú hafa 52 ríki þýtt og aðlagað Creative Commons hugverkaleyfið, þ. á m. öll ríki Norðurlanda utan Íslands en gera má ráð fyrir að innleiðing hér á landi taki um 6 mánuði.
Umfjöllunarefni ráðstefnunnar í gær var frjálst íslenskt samfélag í stafrænum heimi. Eric F. Saltzman, meðstofnandi Creative Commons, hélt erindi þar sem hann sagði frá nauðsyn frjálsra hugverka í framtíðarsköpun og samfélagslegri þátttöku. Þá héldu þeir Julian Assange og Daniel Schmitt, talsmenn WikiLeaks fyrirlestur um nauðsyn þess að samfélagið viti hvað stjórnvöld og fyrirtæki aðhafast. Skemmst er að minnast þess að WikiLeaks lak lánabók Kaupþings fyrr á árinu.
Fréttablaðið sagði frá ráðstefnunni í dag.
Hér að neðan má sjá þegar Þórður S. Gunnarsson, forseti lagadeildar HR og Tryggvi Björgvinsson, formaður FSFÍ, undirrituðu samstarfssamninginn sem sagt er frá hér að ofan.
