Rannís styrkir steinsteypurannsóknir
Tækniþróunarsjóður Rannís hefur samþykkt að styrkja verkefnið Íslenskar basalttrefjar, en byggingarsvið HR er þátttakandi í verkefninu.
Verkefnið snýst um að kanna möguleikann á að nota basalttrefjar til að styrkja og bæta gæði steinsteyptra mannvirkja hérlendis.
Tilgangurinn er m.a. að sýna fram á að brotorka steypunnar aukist með notkun basalttrefjanna, ef miðað er við brotorku í hefðbundinni trefjalausri steypu. Þetta er t.d. sérstaklega mikilvægt í mannvirkjum á jarðskjálftasvæðum. Í öðru lagi verður kannaður möguleikinn á því að nota “bendistál” gert úr basalti í steinsteypu í staðinn fyrir steypustyrktarstál og hindra þar með steypuskemmdir vegna ryðmyndunar. Hugmyndin er að bendistál komi að meira eða minna leyti í stað bendistáls í steypuvirkjum. Í þriðja lagi, verður kannað hvaða möguleikar eru á að nota plástursmottur, gerðar úr basalttrefjum, sem öflugt og hagkvæmt viðgerðarefni á steinsteyptum húsum. Í fjórða lagi að afla þekkingar á notkun basalttrefja í malbik, m.a. til að auka stöðugleika þess og minnka þannig hjólför af völdum skriðs í malbiki.
Professor Ólafur H. Wallewik og Eyþór R. Þórhallsson, dósent við tækni- og verkfræðideild HR, stýra verkefninu fyrir hönd HR, en aðrir þátttakendur í verkefninu eru:
- Hátæknisetur Íslands
- Nýsköpunarmiðstöð Íslands
- Mannvit ehf.
- Einingaverksmiðjan hf.
