Nemendur TVD hljóta verðlaun fyrir námsverkefni
Tveir meistaranemar í tækni- og verkfræðideild Háskólans í Reykjavík og einn tæknifræðingur hlutu nýverið styrki vegna námsverkefna sinna við HR. Sigurður Unnar Sigurðsson og Jón Sigurðsson fengu hvor um sig 500 þúsund króna styrk úr orkurannsóknarsjóði Landsvirkjunar og Sigrún Sigurhjartardóttir hlaut nemendaverðlaun Steinsteypufélags Íslands fyrir árið 2010. Nam verðlaunaféð 75 þúsund krónum.
Sigurður Unnar er í meistaranámi í byggingarverkfræði við Háskólann í Reykjavík. Styrkinn hlýtur hann fyrir meistaraverkefni sem unnið er í samstarfi við Rannsóknarmiðstöð Háskóla Íslands í jarðskjálftafræði á Selfossi. Markmið verkefnisins er að greina hegðun steyptra burðarvirkja vegna jarðhröðunar á upptakasvæðum jarðskjálfta.
Jón er í meistaranámi í byggingarverkfræði við Háskólann í Reykjavík. Styrkinn hlýtur hann fyrir meistaraverkefni um innleiðingu umhverfisvottunarkerfa mannvirkja í rekstri á Íslandi og áhrif þeirra á orkunotkun, innivist og lífsferilskostnað.
Sigrún brautskráðist frá HR í janúar með BSc í byggingartæknifræði. Verðlaunin hlýtur hún fyrir lokaverkefni sem unnið var í samstarfi við Einingaverksmiðjuna. Titill verkefnisins var: „Samvirkni ásteypulags á holplötur.“ Markmiðið var að sannprófa með prófunum að ásteypulag yrði hluti af heildarplötunni.
Styrkirnir frá Landsvirkjun og Steinsteypufélaginu eru veittir einu sinni á ári.
