Vísbendingar um umfangsmikla refsiverða háttsemi
Í skýrslu rannsóknarnefndar Alþingis má finna mikilvægar vísbendingar um umfangsmikla refsiverða háttsemi í rekstri fjármálastofnana og tengdra aðila.
Þetta kom meðal annars fram í erindi Sigurðar Tómasar Magnússonar, prófessors við Háskólann í Reykjavík, á ráðstefnu um rannsóknarskýrsluna sem fram fór í HR í dag.
Sigurður Tómas tók fram að skýrslan hefði þó ekki að geyma sönnunargögn sem myndu duga til sakfellingar fyrir dómi. Skýrslan gæti á hinn bóginn hjálpað til við öflun sönnunargagna.
Ráðstefnan var haldin í samstarfi Háskólans í Reykjavík, Háskólans á Akureyri og Háskólans á Bifröst. Hún hófst klukkan tíu í morgun og hefur staðið yfir í allan dag.
Átján fræðimenn hafa á henni flutt erindi á sex málstofum en í hverri þeirra var fjallað um afmarkaðan þátt efnahagshrunsins.
Tilgangur ráðstefnunnar var að halda áfram umræðu og greiningu rannsóknarskýrslu Alþingis.
Ráðstefnan verður flutt norður á land á morgun, sunnudag, en þar mun hún fara fram í húsakynnum Háskólans á Akureyri.
