Erlendir straumar um allan skóla
Um eitthundrað erlendir nemendur stunda nú nám við Háskólann í Reykjavík. Þeir koma flestir frá Evrópu, en nokkrir nemendur eru frá Kína og S-Kóreu. Fjölmennasti hópurinn kemur frá Spáni eða 24 nemendur, 16 nemendur eru frá Þýskalandi og 11 frá Frakklandi.
Nemendur HR hafa lagt sig fram um að taka vel og hlýlega á móti þessum nýju nemendum. Þeir hafa farið með þeim í gönguferð á Esjuna, kynnt fyrir þeim íslenskt næturlíf og margt fleira er á döfinni á næstu vikum, ferðalög og skemmtanir.
Vel hefur gengið að finna húsnæði fyrir þessa nemendur. Sumir búa á gistiheimilum og aðrir leigja sér húsnæði, yfirleitt nokkrir saman um íbúð.
Flestir nemanna verða hér í eina önn, en þriðjungur þeirra ætlar sér að hafa vetursetu hér á landi.
Nemendum og starfsmönnum HR gefst gott tækifæri til að kynnast erlendu nemunum okkar betur á alþjóðadegi HR sem haldinn verður 30. september, en þá kynna þeir þá skóla sem þeir koma frá og matreiða góðgæti frá heimaslóðum sínum sem okkur býðst að gæða okkur á.
