Brautskráning frá Háskólanum í Reykjavík
EFLING HÁSKÓLA ER LYKILÞÁTTUR ENDURREISNAR
Háskólinn í Reykjavík útskrifaði í dag, laugardaginn 21. janúar, 260 nemendur við hátíðlega
athöfn. Í ræðu við athöfnina lagði dr. Ari Kristinn Jónsson, rektor HR, meðal annars áherslu á auka þyrfti hlutfall tæknimenntaðra á vinnumarkaði til að styðja við vöxt fyrirtækja og hækka framlag ríkisins til háskólamenntunar.
Flestir útskrifuðust úr tækni- og verkfræðideild skólans eða 110 nemendur en Háskólinn í Reykjavík menntar ríflega tvo þriðju hluta þeirra sem ljúka háskólanámi í tæknigreinum á Íslandi. Þá útskrifaði skólinn 42 nemendur úr lagadeild, 34 nemendur úr tölvunarfræðideild og 68 nemendur úr viðskiptadeild.
Við útskriftina sagði dr. Ari Kristinn Jónsson, rektor Háskólans í Reykjavík, meðal annars: „Mikilvægi menntunar fyrir einstaklinga og þjóðfélag er óumdeilt. Við Íslendingar erum réttilega stolt af því hversu vel við búum að verðmætum mannauð og dýrmætum náttúrulegum auðlindum. En við veigrum okkur við að horfast í augu við það að þegar kemur að hlutfalli menntaðra á vinnumarkaði, þá stöndum við höllum fæti gagnvart nágrannaþjóðum okkar.
Neikvæð áhrif þessa sjást greinilega í dag þegar mikil vöntun á menntuðu fólki, sér í lagi tæknimenntuðu fólki, stendur í vegi fyrir vexti fyrirtækja á Íslandi, á sama tíma og atvinnuleysi er í hæstu hæðum.
Fjárframlög til háskóla hafa á undanförnum árum verið skorin niður, þvert á ráðleggingar þeirra sem tekist hafa á við efnahagskreppur í öðrum löndum. Skýrsla OECD um menntun sýndi að árið 2008 var framlag stjórnvalda fyrir hvern nemanda til íslenskra háskóla langt undir meðaltali annarra norðurlandaþjóða. Fyrir hverjar 100 krónur sem hin Norðurlöndin vörðu að meðaltali á hvern háskólanema árið 2008 varði Ísland 58 krónum á nemanda í háskóla. Ofan á þetta kemur svo niðurskurður síðustu ára en framlög stjórnvalda til HR hafa lækkað um 23% á síðustu þremur árum,” sagði Ari Kristinn Jónsson, rektor Háskólans í Reykjavík.
Þá sagði rektor mikilvægt að brugðist yrði við þessum staðreyndum með því að styrkja háskólanám verulega og þá sérstaklega tæknimenntun á háskólastigi, enda hefði reynsla annarra þjóða sem gengið hefðu í gegnum efnahagslegar þrengingar sýnt að það sé lykilþáttur í að vinna bug á efnahagskreppu og atvinnuleysi.
