Reglugerð fyrir Háskólann í Reykjavík

1. Hlutverk

1.1

Háskólinn í Reykjavík (HR) er háskólastofnun sem sinnir æðri menntun, rannsóknum og tengdum verkefnum. Hlutverk Háskólans í Reykjavík er að skapa og miðla þekkingu til að auka samkeppnishæfni og lífsgæði.

2. Stjórnskipulag

2.1 Háskólaráð

Stjórn Viðskiptaráðs Íslands, Samtaka atvinnulífsins og Samtaka iðnaðarins skipa háskólaráð HR. Háskólaráð HR markar stefnu háskólans, ákveður stofnun nýrra deilda, og ákvarðar meginstarfstilhögun háskólans. Jafnframt ákveður það skólagjöld. Háskólaráð skal hafa stöðugt eftirlit með rekstri háskólans, bókhaldi og meðferð á fjármunum hans, þ.m.t. sjóðum þeim, er háskólanum tilheyra. Háskólaráð staðfestir rekstrar- og fjárfestingaráætlun fyrir háskólann og ársreikning hans. Háskólaráð ræður rektor HR, ákveður laun hans og önnur starfskjör.

2.2 Rektor

Rektor kemur fram fyrir hönd háskólans, annast daglegan rekstur hans og ber ábyrgð á rekstrinum gagnvart háskólaráði. Rektor situr fundi ráðsins með málfrelsi og tillögurétt, nema háskólaráð ákveði annað um einstaka fundi. Hinn daglegi rekstur tekur ekki til ráðstafana sem eru óvenjulegar eða meiriháttar. Slíkar ráðstafanir getur rektor aðeins gert samkvæmt sérstakri heimild frá háskólaráði, nema ekki sé unnt að bíða ákvarðana háskólaráðs án verulegs óhagræðis fyrir starfsemi háskólans. Í slíkum tilvikum skal háskólaráði tafarlaust tilkynnt um ráðstöfunina. Rektor leggur árlega fram fjárhagsáætlun HR fyrir háskólaráð til staðfestingar. Rektor ræður forseta deilda og aðra starfmenn háskólans sem heyra beint undir rektor. Hann ber ábyrgð á útgáfu skýrslu um starfsemi háskólans í lok hvers skólaárs. 

2.3 Framkvæmdastjórn

Framkvæmdastjórn HR skal skipuð rektor sem er formaður framkvæmdastjórnar, forsetum deilda og öðrum lykilstarfsmönnum samkvæmt ákvörðun rektors. Rektor skal setja framkvæmdastjórn reglur þar sem kveðið skal á um hlutverk hennar og starfshætti. 

2.4 Forsetar deilda

Forseti deildar fer með faglega stjórn deildar og rekstrar- og fjárhagslega ábyrgð gagnvart rektor og skal eiga frumkvæði að mótun stefnu fyrir deildina. Hann ræður kennara og aðra starfsmenn til deildarinnar. Forseti deildar gerir fjárhagsáætlun fyrir viðkomandi deild sem lögð skal fram til afgreiðslu í framkvæmdastjórn HR sem hluti af heildarfjárhagsáætlun háskólans. Forseti deildar hefur endanlegt ákvörðunarvald í málum sem snerta réttindi og skyldur nemenda.

2.5 Deildir og stjórnun deilda

Við HR eru starfandi eftirtaldar deildir: Kennslufræði- og lýðheilsudeild, lagadeild, viðskiptadeild, tækni- og verkfræðideild og tölvunarfræðideild. Um stofnun nýrra deilda fer skv. 2.1. Forseti deildar ber ábyrgð á stjórnskipulagi deildar samkvæmt stefnu skólans og skal tryggja þátt akademískra starfsmanna í stjórnun hennar. Forseta deildar er heimilt að stofna rannsóknarmiðstöð eða stofnun sem starfar innan deildar eða í samvinnu tveggja eða fleiri deilda eftir kynningu í framkvæmdastjórn og að höfðu samráði við rektor. Þá er heimilt að stofna sérstaka miðstöð til að stunda þjónusturannsóknir eða miðlun endur- og símenntunar fyrir einstaklinga og lögaðila. Stofnun slíkra eininga skal gerð í samráði við rektor og kynnt framkvæmdastjórn.

3. Háskólakennarar og aðrir akademískir starfsmenn deilda

3.1 Stöðuheiti

Til grundvallar nýráðningum og framgangi í akademískar stöður liggja stöðuheitin lektor, dósent, prófessor, atvinnulífsprófessor, sérfræðingur, aðjúnkt og stundakennari.

Eftirfarandi viðmið skulu notuð fyrir þessi stöðuheiti:

• Lektor: Lektor hefur meistara- eða doktorsgráðu frá viðurkenndum háskóla og hefur tekið þátt í marktæku rannsóknar- eða þróunarstarfi og kennslu á háskólastigi, sbr. 3.2.1-3.2.3. Lektor hefur alla burði til að verða framúrskarandi kennari og fræðimaður.
• Dósent: Dósent hefur meistara- eða doktorsgráðu frá viðurkenndum háskóla og hefur fest sig í sessi sem viðurkenndur fræðimaður á sínu sviði. Dósent hefur náð markverðum árangri í öllum þáttum háskólastarfsins, sbr. 3.2.1-3.2.3, og hefur sýnt alla burði til að verða leiðandi í störfum sínum.
• Prófessor: Prófessor hefur doktorsgráðu frá viðurkenndum háskóla eða leggur fram vísindaleg og fræðileg verk sem að gerð og umfangi fela í sér fræðistörf sem með sanngirni verður jafnað til doktorsprófs. Prófessor hefur sýnt þau afköst og hæfni í öllum þáttum háskólastarfsins, sbr. 3.2.1-3.2.3, að af þeim megi ráða að hann sé leiðandi á fræðasviði sínu og í störfum sínum að öðru leyti.
• Atvinnulífsprófessor er einstaklingur sem verið hefur leiðandi í atvinnulífinu á sínu sérsviði, er þekktur af verkum sínum og viðurkenndur sem áhrifavaldur á vinnubrögð í faginu. Hann skal einnig hafa sýnt fram á ótvíræða hæfni til kennslu og miðlunar á háskólastigi.
• Sérfræðingur er fastur starfsmaður sem sinnir einkum rannsóknum.
• Aðjúnkt er fastur starfsmaður í hlutastarfi eða fullu starfi sem sinnir einkum kennslu.
• Stundakennari er lausráðinn starfsmaður í hlutastarfi við kennslu.

Lektors-, dósents- og prófessorsstöður eru framgangsstöður. Til þess að hljóta slíka stöðu þarf að liggja fyrir mat á hæfi viðkomandi. Hið sama gildir um stöðu atvinnulífsprófessors á sviði hagnýtingar þótt slíkar stöður séu ekki framgangsstöður. Deildum er heimilt að setja sér nánari framgangsreglur. Aðjúnkts,- stundakennara- og sérfræðingsstöður eru ekki framgangsstöður. Forseti deildar ákveður hvaða starfsheiti á við hverju sinni.

3.2 Mat á hæfi

Þriggja manna matsnefnd fjallar um hæfi við ráðningu eða framgang í stöðu prófessors, dósents og lektors. Samkvæmt 18. gr. laga nr. 63/2006 um háskóla skulu þeir sem bera þessi starfsheiti hafa lokið meistaraprófi hið minnsta eða hafa jafngilda þekkingu og reynslu að mati dómnefndar. Þeir skulu jafnframt hafa sýnt þann árangur í starfi að þeir njóti viðurkenningar á viðkomandi sérsviði. Að öðru leyti vísast til viðmiða í greinum 3.2.1-3.2.3. Hafi viðkomandi verið metinn hæfur til að gegna sambærilegri stöðu við annan viðurkenndan innlendan eða erlendan háskóla er heimilt að ráða í stöðuna á grundvelli þess mats.

Meirihluti matsnefndar og formaður matsnefndar skulu hafa að minnsta kosti sama hæfi og um er fjallað í viðkomandi mati.  Matsnefnd skal skipuð af framkvæmdastjórn HR.  Menntamálaráðherra tilnefnir þó einn fulltrúa í matsnefnd þegar um stöðu prófessors er að ræða. Við skipun í matsnefnd skal þess gætt að a.m.k. einn fulltrúi í nefndinni starfi ekki við HR. Forseti deildar setur hverri matsnefnd erindisbréf sem byggir á reglum Háskólans í Reykjavík og nánari reglum viðkomandi deildar eftir því sem við á. Niðurstaða matsnefndar skal byggjast á mati hennar á starfi viðkomandi á öllum sviðum háskólastarfsins samkvæmt neðangreindu:

3.2.1 Rannsóknir

Við mat á rannsóknum skal leggja áherslu á vísindalegt gildi þeirra, frumleika og sjálfstæði gagnvart öðrum rannsóknum og ritverkum, þekkingu á stöðu rannsókna á viðkomandi fræðasviði, meðferð heimilda og vísindaleg vinnubrögð. Metin skulu ritrýnd ritverk sem birt hafa verið á innlendum og alþjóðlegum vettvangi. Sömuleiðis skal líta til erinda á ráðsefnum og annarrar þátttöku í rannsóknarsamfélagi, s.s. stjórnunar rannsóknarstofnana, og setu í stjórnum og ritnefndum ráðstefna og tímarita. Önnur útgefin rit og ritgerðir, kennslurit og önnur hugverk eru talin með að því marki sem þau uppfylla þær kröfur sem gerðar eru til rannsókna. Einnig er horft á reynslu af leiðsögn nemenda í rannsóknarnámi. Heimilt er að líta til annars efnis er vitneskju getur veitt um rannsóknarhæfileika viðkomandi.

3.2.2 Kennsla

Við mat á kennslu skal lagt til grundvallar framlag viðkomandi til kennslu á háskólastigi, frumkvæði í uppbyggingu á kennslu, endurbótum og þróun á kennsluaðferðum, nýsköpun í kennslu svo og gerð og útgáfu kennsluefnis. Jafnframt skal litið til alþjóðlegrar reynslu, hversu miklar fræðilegar kröfur kennslan gerir og viðleitni viðkomandi til að hvetja nemendur til sjálfstæðra og fræðilegra vinnubragða. Við mat á kennsluþættinum skal m.a. hafa til hliðsjónar kennslumat nemenda, jafningjamat og greinargerð umsækjanda.

3.2.3 Tengsl við atvinnulíf og samfélag, stjórnun og hagnýting

Við mat á vægi tengsla við atvinnulíf og samfélag skal horft til áhrifa starfa viðkomandi á fyrirtæki og stofnanir, þekkingu og viðhorf í samfélaginu. Meðal annars er horft til þjónusturannsókna og annarra ritstarfa en þeirra sem getið er í 3.2.1. Við mat á vægi stjórnunar skal litið til framlags viðkomandi til stjórnunar og sérfræðingsstarfa innan háskóla og í atvinnulífinu.

4. Námsleiðir, kennsla, námsmat og inntökuskilyrði

4.1 Námsleiðir

Forseti deildar leggur tillögu um nýtt nám og námsleiðir fyrir framkvæmdastjórn til kynningar og rektor til samþykktar. 

4.2 Kennsla

Kennsla í HR fer fram í námskeiðum sem metin eru til eininga. Fullt nám telst 30 einingar (60 ECTS) á námsári að jafnaði og endurspeglar það alla námsvinnu nemanda, viðveru og próf. Kennsluhættir skulu að jafnaði vera fjölbreyttir. Viðmið um kennsluhætti eru nánar útfærð í gæðahandbók HR og kennsluviðmiðum deilda.

4.3 Námsmat

Námsmat skal að jafnaði vera fjölbreytt í hverju námskeiði. Þar með er talið fleira en eitt af eftirtöldu: lokapróf, miðannarpróf, skyndipróf, einstaklings- og hópverkefni eða þátttaka í kennslustundum. Sérstakar reglur HR um próf og vinnu nemenda eru birtar í náms- og prófareglum.

4.4 Inntökuskilyrði

Reglur um inntökuskilyrði eru í samræmi við 19. gr. laga nr. 63/2006 um háskóla. Deild er heimilt að ákveða sérstök viðbótarskilyrði, þar á meðal að halda inntöku- eða stöðupróf. Deild er einnig heimilt að víkja frá skilyrði um stúdentsprófi eða jafngilt próf enda búi nemandi yfir jafngildum þroska eða þekkingu að mati deildar. Deild getur ákveðið að nám sem nemandi hefur stundað utan deildarinnar, þ.m.t. við aðra innlenda eða erlenda háskóla, sé metið til eininga eftir nánari reglum deildar. HR skal gæta samræmis og jafnræðis við afgreiðslu umsókna.  

5. Réttindi og skyldur nemenda

HR hefur málefnalega stjórnsýslu að leiðarljósi í samskiptum við nemendur. Við ákvarðanir sem varða réttindi og skyldur nemenda skal eftir því sem við á gæta meginreglna stjórnsýsluréttar og góðra stjórnsýsluhátta. Framkvæmdastjórn samþykkir náms- og prófareglur. Kennslusvið hefur umsjón með þróun þeirra og annast viðeigandi samráð og samskipti við nemendur. Mat kennara á skriflegu prófi er kæranlegt til prófdómara samkvæmt ákvæðum náms- og prófareglna. Forsetar deilda hafa æðsta ákvörðunarvald í öðrum málum sem varða réttindi og skyldur nemenda. Málsmeðferð slíkra mála fer eftir náms- og prófareglum. Nemendur við HR njóta réttinda skv. reglum um áfrýjunarnefnd í kærumálum háskólanema nr. 1152/2006.

6. Almenn ákvæði

Reglugerð þessi er sett á grundvelli laga nr. 63/2006 um háskóla. Reglugerðin öðlast gildi við staðfestingu háskólaráðs.
Í ljósi reynslunnar skal Reglugerð HR endurskoðuð innan þriggja ára.

Samþykkt af Háskólaráði Háskólans í Reykjavík, 7. júní 2007