Beint í leiðarkerfi vefsins.
Hér verður safnað saman helstu upplýsingum sem gagnast nýnemum við að stíga sín fyrstu skref í náminu í HR. Athugið að starfsfólk þjónustudeildar í afgreiðslum í Ofanleiti (5. hæð) og nýbyggingunni í Nauthólsvík (við inngang) aðstoðar nemendur og leiðbeinir eftir þörfum.
Hér er vísað í gagnlegar upplýsingar á vef HR:
Leiðbeiningasími vegna nýbyggingarinnar er
599 6500
Þar má meðal annars fá aðstoð við að rata um húsið og upplýsingar um hvar deildir og starfsmenn er að finna.
Á vorönn 2010 eru flestar námsgreinar kenndar í nýbyggingu HR við Nauthólsvík. Undantekningar á því er nám sem heyrir undir kennslufræði- og lýðheilsudeild, lagadeild, Opna háskólann, frumgreinamennt og MBA námið - en kennsla þar fer fram í Ofanleiti 2 (við hlið Verslunarskólans).
Öll sala til nemenda, til dæmis á aðgangskortum, hugbúnaði, minniskubbum, prentkvóta og heftum með lesefni fer fram í aðalmóttöku á 1. hæð í Nauthólsvík (ekki lengur á bókasafni) og í aðalmóttöku í Ofanleiti.
Aðalmóttökur afgreiða einnig námsferla i gegnum Kennslusvið, vottorð og sjá um aðra almenna afgreiðslu sem fyrr.
Bóksala stúdenta er með sölu á bókum og ritföngum í herbergi vinstra megin á fyrstu hæð í Nauthólsvík þegar gengið er inn um aðalinnganginn. Opnunartími er frá kl. 11.00 til 16.30 alla virka daga.
Móttökur í skólanum eru fjórar;
Í Ofanleiti er byggingin opin frá 7:15 – 19:15. Eftir það er hægt að komast inn með aðgangskorti. Afgreiðsla í Ofanleiti (skrifstofan á 5. hæð) er opin frá 8 til 16.
Í Nauthólsvík byggingin opin frá 7:15 – 19:15. Eftir það er hægt að komast inn með aðgangskorti. Afgreiðsla í Nauthólsvík (mótttaka við aðalinnganginn) er opin frá 8 til 17.
Aðgangskort fást í afgreiðslu á 5. hæð í Ofanleiti og í móttöku á 1. hæð í Nauthólsvík (staðsett við aðalinngang).
Aðgangur gildir í allar byggingar skólans. (Ofanleiti, Lessal í Kringlu (prentsmiðja) og Nauthólsvík). Viðkomandi þarf að vera búinn að setja inn mynd af sér á innra netinu (MySchool) til að hægt sé að gefa út kortið.
Eldri aðgangskort og -kódar gilda áfram í nýbyggingunni.
Stofunúmer í Ofanleiti eru þriggja stafa tölur, stundum með bókstafnum O fyrir framan, t.d. O-101. Fyrsti tölustafurinn segir til um á hvaða hæð viðkomandi stofa er. Upplýsingaskilti í stigaganginum (við lyfturnar) sýna í hvorri álmunni tiltekin númer eru.
Stofunúmer í nýbyggingunni eru á forminu M.1.01. Bókstafurinn táknar álmu, fyrst um sinn eru það einungis Venus og Mars sem koma til greina. Þegar staðið er í stóra ganginum (Jörð) með bakið í miðju byggingarinnar er Venus á vinstri hönd.
Næst er númer hæðar (hér 1) og loks raðnúmer innan hæðarinnar (hér 01).
Strætisvagnaleiðir 16 og 19 halda uppi ferðum í Nauthólsvík. Ferðir eru á 15 mínútna fresti frá Hlemmi.
Strætóskýli er við akstursleiðina upp að skólanum, skammt frá hringtorginu.
Nemendur og starfsmenn eru hvattir til að nýta strætisvagna eins og mögulegt er, enda mikilvægt að minnka umferðarálag.
Einnig er minnt á að hjóla- og gönguleiðir að skólanum eru mjög góðar. Hjólageymsla verður sett upp við skólann innan skamms.
Tvær leiðir eru að háskólanum í Nauthólsvíkinni. Annars vegar um Flugvallarveg og hins vegar um Nauthólsvíkurveg sem er nýr vegur frá Hringbraut (rétt við Umferðarmiðstöðina).
Nemendur eru hvattir til að samnýta bíla til að minnka umferðarþungann fyrstu vikurnar.
Bílastæði fyrir starfsmenn og nemendur eru staðsett fyrir norðan bygginguna. Bílastæðin eru aðgengileg frá svokölluðum Menntasveig sem kemur rétt eftir hringtorgið.
Næst skólanum er sérstakt bílastæði sem er eingöngu ætlað þeim sem koma saman fleiri en einn einstaklingur í bíl og fyrir gesti. Með þessu vill skólinn hvetja starfsmenn og nemendur til að samnýta bíla, og er það liður í að vernda umhverfið og lágmarka umferðarþunga að skólanum.
Fyrstu mánuðina verður aðalinngangur í bygginguna á miðri þeirri hlið sem vísar að Perlunni, þ.e. þeirri hlið sem er lengst til vinstri þegar komið er akandi að byggingunni.
Allir nemendur fá handhægt yfirlitskort í afgreiðslum skólans (bæði í nýbyggingunni og í Ofanleiti). Fyrsti áfanginn sem tekinn er í notkun samanstendur af tveimur álmum (Venus og Mars) sem aðskildar eru af breiðum gangi (Jörðin). Þægilegt er að nota þann gang sem viðmiðun þegar þarf að ná áttum.
Flestar kennslustofur eru á jarðhæð og þar eru einnig afgreiðsla, mötuneyti og fleira. Lesaðstaða og fleiri kennslustofur eru á annarri hæð. Á þriðju hæð eru skrifstofur starfsmanna.
