Við HR er lögð skýr áhersla á alþjóðlega viðurkenndar rannsóknir og hefur skólinn mótað sér framsækna rannsóknastefnu og mörg markviss skref hafa verið stigin til að efla rannsóknir við skólann á síðustu árum. Rannsóknarvirkni HR hefur aukist jafnt og þétt og fjöldi birtinga á ritrýndum vettvangi að sama skapi. Staða skólans í íslensku rannsóknarumhverfi hefur styrkst verulega á aðeins örfáum árum og hann náð á skömmum tíma að byggja upp sterkt og frjótt rannsóknarumhverfi. Skýringa á þessum markverða árangri má án efa rekja til margra þátta og/eða aðgerða í starfsumhverfi hans og eru hér aðeins nefndir nokkrir þeirra:

1.    Samkvæmt rannsóknarstefnu skólans eiga vísindamenn hans að vera virkir þátttakendur í vísindasamfélaginu og rannsóknir við HR eiga að uppfylla þær kröfur sem gerðar eru til vandaðra vísindarannsókna á alþjóðlegum vettvangi. Vísindamönnum við HR er sett það markmið að öðlast alþjóðlega viðurkenningu fyrir störf sín og mikilvægasti mælikvarðinn á afrakstur rannsóknarstarfs er birtingar á ritrýndum vettvangi.

2.    Rannsóknarvirkni allra akdemískra starfsmanna skólans er metin árlega af erlendri nefnd sérfræðinga (http://www.hr.is/rannsoknir/um/gaedakerfi-hr-i-rannsoknum/). Helstu viðmið í þessu árlega mati eru birtingar á ritrýndum vettvangi, önnur rannsóknarstörf svo sem leiðbeiningar rannsóknarnema, þátttaka í alþjóðlegu rannsóknarstarfi og öflun rannsóknarfjár úr samkeppnissjóðum. Niðurstaða þessa árlega mats er einnig lögð til grundvallar við skiptingu rannsóknarfjár frá ríkinu á milli deilda skólans.

3.    Við HR starfar öflugt rannsóknarráð, sem skipað er einum fulltrúa frá hverri deild auk formanns sem skipaður er af konrektor í samráði við rektor og forseta deilda. Ráðið mótar stefnu skólans í rannsóknum og veitir ráðgjöf um framkvæmd hennar til rektors, konrektors og forseta deilda.  Ennfremur er ráðið rektor og konrektor til ráðgjafar í þeim málum sem lúta að rannsóknum en heyra ekki undir einstakar deildir. 

4.    Við HR er öflugt og virkt gæðakerfi (http://www.hr.is/haskolinn/gaedakerfi-hr/) sem m.a. er ætlað að styrkja stöðu skólans sem háskóla og gæði rannsókna innan hans. Gæðakerfið nær ekki eingöngu til rannsókna heldur einnig til annarra þátta svo sem kennslu og stoðþjónustu.