Nám til BSc-prófs er 180 ECTS einingar.
Námið er byggt á alþjóðlegum viðmiðum og reynslu og er sérstaklega hannað til að koma til móts við alþjóðlegar kröfur. Námið er skipulagt út frá viðmiðum Breska sálfræðingafélagsins (BPS Accreditation Standards) um uppbyggingu grunnnáms í sálfræði á háskólastigi. Uppbygging námsins felst í áherslu á að kenna öll grunnsvið sálfræðinnar, þar á meðal lífeðlislega sálfræði, hugræna sálfræði, þroskasálfræði, sálfræði einstaklingsmunar, félagssálfræði og rannsóknaraðferðir. Til viðbótar taka nemendur valnámskeið til að mynda á sviði heilsusálfræði, vinnusálfræði og gervigreindar.
Fjölbreyttar náms- og kennsluaðferðir og alþjóðlegt samstarf
Námið samanstendur af fyrirlestrum, verkefnavinnu, rannsóknarstofuvinnu og vettvangsnámi. Kennslan fer að nokkru leyti fram á ensku. Þar að auki býðst nemendum kostur á að taka hluta af námi sínu erlendis í gegnum skiptinemaáætlun HR.
Markmið að námi loknu
arkmiðið er að BSc-námið í sálfræði veiti nemendum sem bestan mögulegan grunn til framhaldsnáms eða starfa á Íslandi sem erlendis. BSc-gráðan veitir góða grunnþekkingu og innsýn inn í vísindi og starfsemi sálfræðinga. Gráðan er vel metin í margvíslegum störfum í samfélaginu, þar á meðal í kennslu, hagnýtum rannsóknum, heilsueflingu og forvörnum, blaðamennsku, markaðssetningu, iðnaði og viðskiptum, upplýsingatækni og opinberum störfum. Starfsheitið sálfræðingur er lögverndað starfsheiti sem fæst eftir að minnsta kosti 2 ára sérnám á meistarastigi.
