Lokaverkefni nemenda í tölvunarfræðideild eru tvenns konar, hefðbundin lokaverkefni og lokaverkefni með rannsóknaráherslu. Í lokaverkefnum fá nemendur úthlutað verkefniskennara, sem þeir hitta yfirleitt einu sinni í viku, og prófdómara, sem fylgist með framvindu verkefnisins nokkrum sinnum yfir verktímann (15 vikur). Mælt er með að nemendur taki lokaverkefni á 6. önn.
Hefðbundin lokaverkefni
Hefðbundin lokaverkefni gefa nemendum tækifæri á að vinna að raunverulegu hugbúnaðarverkefni í nánum tengslum við atvinnulífið. Nemendur vinna í 2-4 manna hópum, undir leiðsögn verkefniskennara, og fá aðstöðu hjá tilteknu fyrirtæki. Frumkvæði að verkefnum hefur á undanförnum árum bæði komið frá fyrirtækjum og nemendum. Nemendur verða að hafa lokið a.m.k. 78 ECTS einingum og verklegu námskeiði, Greiningu og hönnun hugbúnaðar og Hugbúnaðarfræði. Mælt er með að nemendur taki lokaverkefni á 6. önn.
Skýrari reglur eru nú um mat á einkunn fyrir lokaverkefnin, þar sem frumkvæði nemenda og nýbreytni í lokaverkefnunum er hluti af heildarmati. Til að styðja nemendur við að velja verkefni sem taka á nýbreytni, verða tillögur frá fyrirtækjunum flokkaðar í 3 flokka af sérskipaðri lokaverkefnanefnd áður en nemendur velja, en þeir eru: mikil, miðlungs eða lítil nýbreytni. Nemendur munu eingöngu velja úr innsendum tillögum.
Lokaverkefni með rannsóknaráherslu
Lokaverkefni með rannsóknaráherslu gefa nemendum tækifæri til að kynnast rannsóknum á sviði tölvunarfræði og vinna í nánu samstarfi við fræðimenn skólans. Nemendur vinna 1-3 saman og fá oft aðstöðu í skólanum til verkefnavinnunnar. Nemendur verða að hafa lokið a.m.k. 138 ECTS einingum og öllum verklegum námskeiðum.
Nemendur skipuleggja verkefni í samvinnu við verkefniskennara, sem þau hitta venjulega einu sinni í viku, en deildin úthlutar prófdómara sem fylgist með framvindu verkefnisins nokkrum sinnum yfir verktímann.
Skil í Skemmuna
Hér má sjá nánar leiðbeiningar um hvernig nemendur setja inn verkefni í Skemmuna
