Alþjóðaskrifstofa Háskólans í Reykjavík

Alþjóðlegt efnahagskerfi heimsins og upplýsinga- og þekkingarsamfélagið sem við lifum og hrærumst í færir okkur tækifæri sem okkur hefur ekki einu sinni dreymt um en á sama tíma gerir nýr heimur nýjar kröfur til okkar. Háskólinn í Reykjavík er alþjóðleg mennta og rannsóknastofnun. Eitt af markmiðum skólans er að auka alþjóðlega færni nemenda þannig að þeir geti tekið virkan þátt í og haft áhrif á alþjóðlegan vinnumarkað að námi loknu.  Í alþjóðlegu samfélagi er alþjóðleg færni mikilvæg í öllum fræðigreinum og hún gefur nemendum samkeppnisforskot.  

Alþjóðleg færni getur verið með ýmsu móti allt frá tungumálakunnáttu til menningarlæsis. Nemendur við Háskólann í Reykjavík geta öðlast alþjóðlega færni með ýmsu móti.  Þeir geta:

• farið út sem skiptinemi í eitt eða tvö misseri
• sótt námskeið sem skólinn stendur fyrir erlendis
• sótt um að vera HR-félagi
• tekið þátt í námsferðum erlendis, sjá heimasíður deilda
• sótt tungumálanámskeið sem kennd eru við skólann (sjá tungumálanámskeið í VD og LD)
• farið í starfsþjálfun hjá fyrirtækjum erlendis (sjá meistaranám í alþjóðaviðskiptum og atvinnuþjónustuna)

Háskólinn í Reykjavík er í samstarfi við háskóla í Evrópu innan Erasmus-áætlunarinnar, Nordplus-áætlunarinnar og er jafnframt með tvíhliða samninga við háskóla utan Evrópu. Þessir samningar veita möguleika á stúdenta- og kennaraskiptum. Stúdentaskipti gera stúdentum kleift að stunda eins til tveggja anna nám við háskóla erlendis.

Alþjóðaskrifstofa HR leggur áherslu á að aðstoða nemendur skólans við að sækja um sem skiptistúdentar við samstarfsskóla Háskólans í Reykjavík. 

Hér til vinstri má finna tengla yfir gagnlegar upplýsingar og leiðbeiningar fyrir þá sem hafa áhuga á stúdenta- eða kennaraskiptum.  Frekari upplýsingar má nálgast hjá starfsfólki alþjóðaskrifstofu HR.

Háskólinn í Reykjavík býður jafnframt alþjóðlegt meistaranám við deildir skólans. Nánari upplýsingar um meistaranám er að finna á síðum deildanna.

 Sá einn veit er víða ratar...