Gátlisti fyrir námsdvöl erlendis

1. Byrjaðu snemma að undirbúa þig, helst ári fyrir brottför.
2. Byrjaðu á því að skoða upplýsingar á heimasíðu alþjóðskrifstofu HR og aðrar upplýsingar aðgengilegar á skrifstofunni sjálfri.
3. Lestu ferðaskýrslur fyrrverandi skiptinema HR. Þessar skýrslur geta gefið dýrmætar og nýlegar upplýsingar um námið, menningu dvalarlandsins og önnur félagsleg atriði sem vert er að hafa í huga hvort heldur sem um er að ræða skólann sjálfan eða landið.  Þessar skýrslur eru aðgengilegar á alþjóðaskrifstofu HR.
4. Kannaðu möguleika þína í löndum sem þú þekkir lítið.
5. Taktu þátt í alþjóðadegi HR
6. Kannaðu hvort þú uppfyllir nauðsynleg skilyrði til þess að eiga kost á því að fara utan í skitptinám. Til dæmis er krafist lágmarksenskukunnáttu fyrir Mexíkó.
7. Lestu námsskránna þína og ef þú ert ekki klár á hvaða námskeið þú ættir að velja til þess að fá þau metin sem hluta af þínu námi geturðu pantað viðtal við yfirmann þinnar deildar.
8. Ef þér tekst ekki að finna nægjanlegar upplýsingar um þann eða þá háskóla sem þér finnast mest spennandi geturðu prófað að leita af upplýsingum á netinu.
9. Kannaðu tímanlega hvort þú hafir útvegað öll gögn. Ef þú ert ekki viss, hafðu þá samband við alþjóðaskrifstofu HR.
10. Um leið og þú hefur ákveðið hvert þú vilt fara ættirðu að kanna strax hvaða styrkir eru í boði og sækja um þá. Ekki bíða eftir að umsóknin þín fái samþykki. Skilaðu inn ítarlegri og vandaðri umsókn um styrki.
11. Reyndu að komast í samband við stúdenta HR sem áður hafa farið utan í viðkomandi háskóla og kannaðu hvort einhverjir erlendir skiptistúdentar við HR komi frá þeim háskóla.
12. Gerðu fjárhagsáætlun. Passaðu upp á að vegabréfið þitt sé í gildi að minnsta kosti út áætlaðan dvalartíma erlendis. Pantaðu þér flugfar til að fá það á sem hagstæðustu verði. Kannaðu reglur um dvalarleyfi.
13. Alþjóðaskrifstofa HR mun vera í sambandi við þig í gegnum HR netfangið þitt. Ef þú sérð ekki fram á að nota það netfang skaltu láta áframsenda allan póst á það netfang sem þú ætlar þér að nota.
14. Tæknideild HR, við móttökuna í Sólinni, getur gefið þér leiðbeiningar um það hvernig þú framkvæmir þetta.
15. Ef þú færð ekki pláss í þeim háskóla sem þú valdir, ekki gefa upp alla von! Kannaðu aðra möguleika og pantaðu viðtal við starfsfólk alþjóðaskrifstofu HR til að aðstoða þig við það.
16. Ef þú hefur áhuga á að leigja húsnæði þitt eða herbergi á meðan þú dvelur erlendis í skiptinámi þá vantar á hverri önn, fjölda erlendra skiptistúdenta sem koma til náms í HR, þak yfir höfuðið frá miðjum ágúst til desemberloka, eða frá byrjun janúar til júníloka.
17. Þegar þú snýrð aftur heim mundu þá að fylla út ferðaskýrslu og skila henni inn til alþjóðaskrifstofu HR.