Námsstyrkir
ERASMUS/Nordplus styrkir
Til að auðvelda stúdentaskipti á milli háskóla í Evrópu og innan Norðurlandanna geta nemendur sótt um ERASMUS og Nordplus styrki. Nemendur HR sem sækja um skiptinám í þeim skólum sem HR er með ERASMUS eða Nordplus samning við geta sótt um styrk. Styrknum er einungis ætlað að mæta ferða- og viðbótarkostnaði sem stúdentar verða fyrir við að flytjast á milli skóla, svo og kostnaði sem þeir kunna að greiða vegna tungumálanáms í tengslum við nám sitt erlendis. Að öðru leyti er gert ráð fyrir að nemendur haldi venjulegu láns- eða styrktarmöguleikum heima fyrir óbreyttum.
ERASMUS styrkur er hluti af Menntaáætlun Evrópsambandsins til að styrkja samvinnu á milli háskóla í Evrópu með áherslu á gæði náms og stuðla að viðurkenningu á háskólanámi milli evrópskra háskóla.
ERASMUS styrkur yrir skólaárið 2011-12 er 265 evrur á mánuði auk ferðakostnaðar; 500 evrur til Kaupmannahafnar og London og 650 evrur til annarra landa í Evrópu. Til þess að sækja um ERASMUS styrk verður að fylla út Erasmus umsókn, prenta hana út og skila undirrituðu eintaki til alþjóðasviðs HR, 3. hæð. Athugið að boðið er upp á prentvæna útgáfu EFTIR að búið er að senda hana rafrænt ("submit").
Nordplus styrkur er hluti af Menntaáætlun Nordplus til að styrkja samvinnu á sviði menntamála á Norðurlöndunum og Eystrasaltsríkjunum með áherslu á gæði og nýsköpun. Nordplus styrkur fyrir skólaárið 2011-2012 er áætlaður 180-200 evrur á mánuði auk 500 evra ferðastyrks. Ekki þarf að sækja sérstaklega um Nordplus styrkinn fyrr en eftir að skiptinámið hefur verið samþykkt. .
Þeir nemendur sem fá ERASMUS og Nordplus styrki skuldbinda sig til að vera skólanum innan handar við að kynna HR í gestaskólanum og veita upplýsingar um gestaskólann í HR.
Styrki þarf að gefa upp til skatts
Tilgreina þarf styrkinn í eftirfarandi reiti á skattframtali.
2.3 Lífeyrisgreiðslur. Greiðslur frá Tryggingarstofnun. Aðrar bótagreiðslur, styrkir o.fl
-Styrkir til náms, rannsóknar- og vísindastarfa (heildarfjárhæð) – „reitur 131“
-Tilgreina skal hér upphæð Erasmus styrksins.
2.6 Frádráttur
-Frádráttur á móti náms, rannsóknar- og vísindastyrkjum skv. meðfylgjandi greinargerð.
Fylla þarf út greinargerð sem er aðeins aðgengileg gegnum vefframtal (ef talið er fram á pappír er hægt að láta fylgja með yfirlitsblað vegna styrks og frádráttar).
Hér skal fylla út eftirtalda frádráttarliði:
-„Ferðakostnaður“: tilgreina hér útlagðan ferðakostnað í samræmi við kvittanir
-„Annar kostnaður, hvað?“: setja hér skýringartextann „Ýmis kostnaður tengdur námi fyrir utan framfærslu í “X” mánuði í “land” - Erasmus styrkur“ og setja inn þá upphæð sem eftir stendur þegar búið er að draga frá ferðakostnað.
Samkvæmt gildandi reglum er ekki heimilt að telja almenna framfærslu til frádráttar en gengið er út frá því viðeigandi breytingar til að gera styrkina formlega skattfrjálsa verði komnar inn síðar á þessu ári. Ef styrkþegi getur tilgreint kostnað í öðrum frádráttarliðum (t.d. námskeiðsgjöld eða námsgögn) er um að gera að nýta það.
Nánari upplýsingar um mögulega styrki má nálgast á heimasíðu alþjóðaskrifstofu háskólastigsins www.ask.hi.is.
