Í meistaranámi í véla- og rafmagnsverkfræði við Háskólann í Reykjavík er boðið upp á fjölbreytta möguleika í verkefnavali, ásamt sterkri verkfræðilegri nálgun.  Til grundvallar náminu liggur svokölluð véleindafræði (e. mechatronics) þar sem véla- og rafmagnsverkfræði skarast.  Lögð er áhersla á  að nemendur geti beitt ýmsum þáttum verkfræðinnar, t.d. vélhlutahönnun, stýritækni, merkjafræði, kerfisgreiningu og hermun til þess að fást við yfirgripsmikil vandamál.  Jafnframt hafa nemendur kost á að vinna að vísindarannsóknum á sviðinu eða tengdum sviðum.

Lögð er áhersla á að nemendur öðlist traustan fræðilegan skilning til að geta spurt markverðra rannsóknarspurninga;  greiningarhæfileika og tæknilega færni til að svara þeim; og færni við að koma niðurstöðum á framfæri á viðeigandi hátt.

Uppbygging náms
Nám til meistaragráðu er 120 ECTS einingar og er miðað við að því sé lokið á fjórum önnum.  Meistaraverkefni eru almennt 30 ECTS eininga verkefni (ein önn) nátengd atvinnulífinu. Einnig er möguleiki á að taka 60 ECTS rannsóknarverkefni (2 annir) ef bakgrunnur nemenda fullnægir kröfum  sem gerðar eru til BSc-gráðu í véla- eða rafmagnsverkfræði. Allir nemendur taka skyldunámskeiðið Sameiginlegt hönnunarverkefni og þrjú námskeið sem þeim fylgja.

Tvær námslínur eru mögulegar: Vélaverkfræði og Rafmagnsverkfræði.  Fimm  kjarnanámskeið eru á hvorri línu. Taka þarf þrjú námskeið úr annarri hvorri línunni (m.v. 30 eininga meistaraverkefni), allt eftir því hvort ætlunin er að útskrifast sem véla- eða rafmagnsverkfræðingur. Bakgrunnur nemenda ræður mestu um á hvora línuna þeir innritast. 

Önnur námskeið eru valin í samráði við leiðbeinendur þannig að þau falli að áhugasviði nemenda og meistaraverkefni þeirra.  Valnámskeið geta verið tekin af mismunandi sviðum, bæði innan Tækni- og verkfræðideildar, sem utan.  Einnig eiga nemendur þann kost að taka hluta úr námi sínu erlendis.
 
Rannsóknir
Á véla- og rafmagnssviði fara fram afar fjölbreyttar rannsóknir sem nemendur geta unnið meistaraverkefni sín í tengslum við.  Rannsóknir eru unnar á sviði örtækni, straumfræði, bestunar, véleindafræði, endurnýjanlegrar orku og hagnýtrar stærðfræði svo nokkuð sé nefnt.

Umsóknarferli og inntökuskilyrði
Skilyrði fyrir inngöngu er að nemendur hafi lokið BSc námi í verkfræði, eða tengdu fagi með góðum árangri.  Leitað er að nemendum sem hafa mikinn áhuga og eru tilbúnir að leggja hart að sér í fullu námi.  Þeir sem hefja meistaranám í véla- og rafmagnsverkfræði fá strax umsjónarmann, sem verður að öllu jöfnu aðal- eða meðleiðbeinandi lokaverkefnis þeirra.  Nemendur velja námskeið í sambandi við umsjónarmann með hliðsjón af áhugasviði og lokaverkefni. 

Frekari upplýsingar

Jóhanna Fríða Dalkvist verkefnastjóri meistaranáms, johannafd@ru.is

Guðrún Sævarsdóttir sviðsstjóri véla- og rafmagnssviðs, gudrunsa@ru.is