Rafmagnstæknifræði BSc

Rafmagnstæknifræði er spennandi og einkar víðfemt hátæknisvið sem spannar rafmagnsfræði, rafeindatækni, raforkufræði, fjarskiptatækni, stýritækni, tölvutækni, stóriðju og orkutækni á breiðum grundvelli.

,,Skólinn er persónulegur, hóparnir þéttir og aðgengi að kennurum mjög gott. Á vorin eru kenndir þriggja vikna áfangar, hagnýt verkefni, þar sem lærdómurinn af áföngum vetrarins er dreginn saman í einn stóran áfanga. Þar eru fræðin notuð og sett í framkvæmd. " Steinar Rúnarsson Rafmagnstæknifræði 4. önn

Starfssvið rafmagnstæknifræðinga er fjölbreytt, hvort heldur unnið er við hönnunarverkefni, framkvæmdir eða stjórnun og eftirlit. Störf rafmagnstæknifræðinga felast einkum í ráðgjöf, uppsetningu, skipulagi, hönnun og smíði raforkukerfa og rafeindabúnaðar. Rafmagnstæknifræðingar annast einnig eftirlit með verklegum framkvæmdum og framleiðslu, auk þess að gegna lykilhlutverkum í stóriðju og orkuiðnaði. Ör þróun er fyrirsjáanleg í faginu í nánustu framtíð, s.s. á sviði líftækni, sjálfvirkni og kraftrafeindatækni. Hægt er að auka fagþekkingu og sérhæfingu með frekara námi og störfum hér á landi og erlendis.

,,Skortur á rafmagnstæknifræðingum á markaðnum."   Skapti Valsson, aðstoðarforstjóri Mannvits

Á 5. og 6.önn námsins taka nemendur valfög sem bjóða upp á sérhæfingu í veikstraum eða sterkstraum.  Auk námskeiða í rafmagnstæknifræði geta þeir valið námskeið af öðrum námsbrautum s.s. tölvunarfræði, hátækniverkfræði og vél- og orkutæknifræði. Lokaverkefni í rafmagnstæknifræði eru tengd sérhæfingu á veikstraum-, tölvu- eða sterkstraumssviði.