Aðstaðan

Í háskólabyggingu HR fer öll kennsla fram. Þar er lesaðstaða nemenda og hópavinnuherbergi, ásamt mötuneyti, náms- og starfsráðgjöf, kaffihús, verslun og líkamsrækt. Auk þess að hýsa alla kennslu eru í byggingunni stundaðar fjölbreyttar rannsóknir og gerðar ýmiss konar tilraunir.

Almenningi er velkomið að skoða húsið á afgreiðslutímum. Svo er líka hægt að skoða HR í 360°. Kíktu í tölvunni, spjaldtölvunni, snjallsímanum og með VR-gleraugum.

HR í 360°

Leiðbeiningar 

Snjallsími með VR gleraugum

  • Opnaðu HR í 360°.
  • Smelltu á táknið með auganu og snúðu símanum á hlið til að láta myndina birtast tvöfalda.
  • Settu símann í gleraugun.
  • Settu fingur í gegnum gatið til að halda gleraugunum upp að augunum.
  • Snúðu stautinum ofan á gleraugunum til að laga fókusinn.
  • Hreyfðu gleraugun til að skoða í kringum þig.
  • Beindu gleraugunum í átt að örinni sem þú vilt færa þig á. Þú þarft að bíða í um 3 sekúndur og færist þá á þann stað.

Snjallsími með pappagleraugum

  • Opnaðu HR í 360°.
  • Smelltu á táknið með auganu og snúðu símanum á hlið til að láta myndina birtast tvöfalda.
  • Settu símann í gleraugun.
  • Hreyfðu gleraugun til að skoða í kringum þig.
  • Beindu gleraugunum í átt að örinni sem þú vilt færa þig á. Þú þarft að bíða í um 3 sekúndur og færist þá á þann stað.

Snjallsími eða spjaldtölva

  • Opnaðu HR í 360°
  • Hreyfðu tækið til að skoða í kringum þig eða notaðu fingurinn á snertiskjánum til að hreyfa þig til.
  • Ýttu á ör sem bendir niður til að fela stjórntakkana.

Til að skoða næsta rými:

  • Smelltu á rauða ör á skjánum
  • Smelltu á smámynd (e. thumbnail) til að fara beint í rýmið sem sést á myndinni.
  • Ýttu á „spóla áfram“ táknið til að sjá næsta rými.

Tölva

  • Opnaðu HR í 360°
  • Notaðu músina, örvarnar á lyklaborðinu eða rauðu örvarnar á skjánum til að skoða í kringum þig.
  • Smelltu á ör til að færa þig þangað sem þú vilt fara.
  • Einnig er hægt að smella á smámyndirnar (e. thumbnails) til að fara beint í rýmið sem þar sést.

Um bygginguna

Húsnæði Háskólans í Reykjavík er rúmgott, birtumikið og með góðan anda og á sinn þátt í að skapa það samfélag sem HR er. Húsið býður upp á afar góða aðstöðu til kennslu, lesturs og samvinnu nemenda. Kennslustofur eru vel búnar og nemendur geta nýtt sér hópavinnuherbergi. Almenn aðstaða er opin nemendum allan sólarhringinn.

Hönnun hússins byggist á ólíkum álmum sem tengjast saman í miðrými sem kallað er Sól. Nöfn álmanna eru sótt í sólkerfið og reikistjörnur þess. Næst Sól er Merkúríus, þá Venus og svo koll af kolli. Í byrjun árs 2010 voru álmurnar Venus og Mars teknar í notkun ásamt göngugötunni Jörð. Sólin og Úranus voru svo teknar í notkun um miðjan ágúst sama ár.