Stelpur og tækni

Kynnast tækni á lifandi og skemmtilegan hátt

Háskólinn í Reykjavík hvetur konur til náms í tæknigreinum, og liður í því er verkefnið Stelpur og tækni, þar sem um fjögur hundruð stelpum úr 9. bekkjum grunnskóla er boðið í háskólann og nærri 20 tæknifyrirtæki. Markmiðið er að vekja áhuga þeirra á ýmsum möguleikum í tækninámi og störfum, brjóta niður staðalímyndir og sýna þeim fjölbreytileikann sem einkennir tækniiðnaðinn. 

Að verkefninu stendur Háskólinn í Reykjavík ásamt Ský og Samtökum iðnaðarins. Það fór upphaflega af stað með styrk úr framkvæmdasjóði jafnréttismála og hefur nú hlotið styrk úr samfélagssjóði Alcoa. 

Stelpur og tækni 2016

Alþjóðlegt verkefni

„Girls in ICT Day“ er haldinn víða um Evrópu í apríl á hverju ári og er styrktur af ITU (International Telecommunication Union) og Evrópusambandinu í tengslum við Digital Agenda-áætlunina. HR hefur haldið utan um daginn hér á landi frá upphafi, árin 2014 og 2015.  

Vinnusmiðjur í HR

Vinnusmiðjur eru haldnar í HR í umsjá /sys/tra, félags kvenna í tölvunarfræði við HR og kennara tölvunarfræðideildar og tækni- og verkfræðideildar. Viðfangsefnin eru af ólíkum toga, til dæmis kynnast þær forritun og gerð vefsíðu með tungumálum vefhönnunar, HTML og CSS. Í ár verður meðal annars líka boðið upp á vinnusmiðju um uppbyggingu tölvuleikja og brotaþol beina. 

Heimsókn í tæknifyrirtæki

Eftir að vinnustofunum lýkur eru tæknifyrirtæki heimsótt þar sem gefin er innsýn í starfsemina og þau tækifæri sem stelpum bjóðast á vinnumarkaði að loknu tækninámi. Konur sem starfa hjá fyrirtækjunum hafa jafnframt deilt reynslu sinni.

Þátttaka fyrirtækja

Ef fyrirtæki þitt hefur áhuga á að taka þátt í Stelpur og tækni deginum, vinsamlega hafðu samband við Jóhönnu Vigdísi Guðmundsdóttur, framkvæmdastjóra Tengsla, á netfanginu johannavigdis@ru.is.


Var efnið hjálplegt? Nei