Doktorsnám við lagadeild

Doktorsnám er fullt nám í þrjú ár og er 180 einingar. Gert er ráð fyrir því að námstíminn vari í fjögur ár ef nemandi sinnir kennslu eða öðrum störfum með náminu.

Til að uppfylla kröfur til að öðlast doktorsgráðu frá lagadeild Háskólans í Reykjavík skal doktorsnemi, undir leiðsögn doktorsmenntaðs leiðbeinanda, hafa unnið vísindalegar rannsóknir sem fela í sér sjálfstætt framlag til þekkingarsköpunar á sviði lögfræði.

Doktorsgráðu skal því aðeins veita að doktorsnemi hafi unnið sjálfstæðar frumlegar rannsóknir sem hafi nægjanlegt nýnæmi og vísindalegt gildi og séu af nægu umfangi til þess að verðskulda gráðuna.

Stundakennsla og starfssvið

Doktorsnemi sem velur að vinna hjá HR með námi stendur til boða 25% starf sem stundakennari/aðstoðarmaður á ári. Doktorsnemi í 25% starfi kennir 2 námskeið á 4 árum, eða sem svarar 1/2 námskeiði á ári. Doktorsnemi sinnir að öðru leyti störfum aðstoðarmanns, s.s. aðstoð við yfirferð prófa, umsjón með námsverkefnum eða rannsóknaraðstoð hjá leiðbeinanda í einn mánuð á ári. Verkefni skulu vera skýrt skilgreind.   

Námskeið

Ekki er sérstök námskeiðalína í doktorsnámi. Þess í stað eru námskeið og rannsóknarmálstofur skipulögð ad hoc, eða í samstarfi við aðra háskóla og rannsóknasamstarf. Leiðbeinandi og doktorsnemi skipuleggja saman einstaklingsbundna námsáætlun sem er til þess fallin að auka hæfni og þekkingu doktorsnemans til að vinna að rannsóknum og kennslu á sínu sérsviði.

Skólagjöld                                                                                                     

Doktorsnemar greiða skólagjöld sambærileg skólagjöldum í ML-námi í eina önn. Skólagjöld í HR eru ákveðin árlega. Lesa reglur um skólagjöld.

Starfsstöð                                          

Doktorsnemum er skylt að stunda rannsóknir sínar við HR og að vera búsettir í nágrenni skólans í 18 mánuði af námstímanum. Doktorsnemi skal dvelja við erlenda háskólastofnun í allt að 6 mánuði. 

Umsækjendur þurfa að hafa lokið meistaranámi í lögfræði eða skyldum greinum og hafa sýnt afburðaárangur í námi og/eða starfi og vera líklegir til að geta tekið frumkvæði í þekkingarsköpun á sviði vísinda eða atvinnulífs.

Opið er fyrir umsóknir frá 15. febrúar - 1. apríl fyrir haustönn og frá 15. ágúst - 1.október fyrir vorönn.

Umsóknir

Sótt er um námið á sérstökum umsóknarvef. Með umsókn skulu fylgja staðfest afrit af prófskírteinum, feril- og ritaskrá ásamt drögum að rannsóknaráætlun. Umsækjandi skal tilgreina sérstaklega óskir sínar um leiðbeinanda úr röðum kennara í fastri stöðu við lagadeild Háskólans í Reykjavík og skal umsókn og rannsóknaráætlun samþykkt af honum.

Í doktorsnámi mínu er ég að rannsaka hvort sjúklingum sem lenda í áföllum í tengslum við meðferðir hjá heilbrigðisstarfsmönnum sé tryggt réttaröryggi og þá aðallega með tilliti til laga um sjúklingatryggingu. Einnig rannsaka ég hvort það hafi áhrif á réttarstöðu sjúklinga hvort viðkomandi meðferð hafi átt sér stað innan opinbera heilbrigðisgeirans eða einkageirans. Kennarar lagadeildar búa að víðtækri reynslu og eru afkastamiklir í rannsóknum. Ég myndi segja að helsti kostur lagadeildar HR sé þessi mannauður.

Jóna Benný Kristjánsdóttir, doktorsnemi og stundakennari við lagadeild HR

Allar nánari upplýsingar um nám við lagadeild við HR er hægt að fá hjá starfsfólki deildarinnar, vinsamlegast hafðu samband við okkur með tölvupósti eða spurðu um okkur í afgreiðslu á 1. hæð í Sólinni.

Einnig er hægt að leita til náms- og starfsráðgjafa.

Lagadeild Háskólans í Reykjavík og lagadeild Óslóarháskóla eru með samning sín á milli um doktorsnám. 

Samningurinn felur í sér að:

• Doktorsnemar við HR fá aðgang að námskeiðum á doktorsstigi við Óslóarháskóla og geta valið að taka alla námskeiðaröðina sem þar er í boði. Doktorsnemar hér á landi eru það fáir að ekki hefur reynst unnt að bjóða upp á doktorsnámskeið nema örsjaldan.
  

• Doktorsnemar sem búsettir eru á Íslandi og vilja stunda nám við Óslóarháskóla geta stundað það frá Íslandi, haft aðstöðu í HR og annan leiðbeinanda úr kennaraliði skólans. Íslenskur fræðaheimur er lítill og ekki völ á hæfum leiðbeinendum á öllum sviðum. Við lagadeild HR er gerð sú skilyrðislausa krafa um að aðalleiðbeinendur hafi sjálfir lokið doktorsprófi. Með þessu samstarfi  fjölgar því mjög þeim fræðasviðum sem hægt er að stunda doktorsnám á.