Háskólinn í Reykjavík var gull bakhjarl Sjávarútvegsráðstefnunnar 2025 sem fram fór í Hörpu dagana 6.-7. nóvember. Yfirskrift ráðstefnunnar í ár var; Róum í sömu átt-Verðmætasköpun og samkeppnishæfi í íslenskum sjávarútvegi.

Bergur Ebbi hóf ráðstefnuna á gamansaman hátt og velti fyrir sér hvernig sjávarútvegur, sjómennska og sjávartengt atvinnulíf hafi mótað íslenskt tungumál. Sagði hann að í raun væri vart hægt að eiga samtal án þess að sjórinn endurspeglaðist í orðræðunni.

Kristinn Hjálmarsson, þróunarstjóri Opna háskólans, var formaður Sjávarútvegsráðstefnunnar árin 2023 - 2024 og sat í ár í faghópnum auðlind, nýting og veiðar sem kom að efnistökum fyrir þann þátt ráðstefnunnar. Hann segir að umræðan í ár hafi mótast af skýrum skilaboðum frá aðilum í sjávarútvegi:

Það er mikill vilji og áhugi innan greinarinnar á samstarfi við stjórnvöld um stefnumótun og framkvæmd sjálfbærra veiða við Ísland þar sem sjálfbærni er umhverfisleg, samfélagsleg og efnahagsleg. Með okkar sérstöðu í kennslu og rannsóknum hér í HR  getum við lagt okkar af mörkum við að auka þekkingu og skilning á sjálfbærni atvinnugreina á Íslandi.

Í Háskólanum í Reykjavík er sjálfbærni höfð til grundvallar við ákvarðanatöku í kennslu, rannsóknum og rekstri þannig að áhrif skólans á sjálfbærni séu augljós og um leið hvatning til að gera betur.