Fréttir: 2019

Nýafstaðinni önn lauk á þriggja vikna námskeiðum eins og venjulega en við HR eru annirnar brotnar upp í tvo hluta. Í þriggja vikna námskeiðunum er námsefnið er sett í hagnýtt samhengi með verkefnavinnu, hópavinnu, gestafyrirlesurum eða samstarfi við fyrirtæki.

Nemendur eru hvattir til að fylgjast vel með veðrinu og veðurspá í dag og fara heim upp úr hádegi, sé þess kostur. Prófum verður ekki frestað í dag en nemendum sem búa utan höfuðborgarsvæðisins verður gefinn kostur á að taka próf í sinni heimabyggð.

Nemendur við viðskiptadeild Háskólans í Reykjavík unnu á dögunum verkefni með sjávarútvegsfyrirtækinu Brim sem miðaði að því að auka sjálfbærni fiskveiða enn frekar með notkun repjuolíu sem eldsneyti í stað olíu.

Erna Sif Arnardóttir, rannsóknasérfræðingur við verkfræðideild Háskólans í Reykjavík fékk ásamt samstarfsaðilum nýlega styrk úr Innviðasjóði Rannís til uppbyggingar aðstöðu til svefnrannsókna. Hún segir ríkt tilefni til að rannsaka það betur hvernig við Íslendingar sofum. Niðurstöðurnar munu nýtast bæði á Íslandi og á heimsvísu.

MBA-námið við Háskólann í Reykjavík hefur þróað námskeið í samstarfi við MITdesignX nýsköpunarmiðstöðina við MIT háskólann í Boston og Icelandic Startups sem er hið fyrsta sinnar tegundar hér á landi. Í lokaverkefni sínu munu nemendur þróa vaxtarstefnu fyrir íslensk sprotafyrirtæki. Náminu lýkur á þriggja daga ferð til Boston þar sem nemendur kynna tillögur sínar og fá endurgjöf frá sérfræðingum MIT.

Starfsfólk Háskólans í Reykjavík og nemendur tóku þátt í dagskrá vegna Dags íslenskrar tungu síðastliðinn föstudag. Það var Háskólagrunnur HR sem stóð fyrir dagskránni en það er eina deild HR sem kennir íslensku.

Ræður alþingismanna á Alþingi Íslendinga eru nú skráðar sjálfkrafa af gervigreindum talgreini. Talgreinirinn skráir um tíu mínútur af ræðum á einungis þremur og hálfri mínútu, hann hefur allt að 90% rétt eftir og auðveldar til muna skráningu og birtingu á ræðum alþingismanna.

Háskólinn í Reykjavík og Icelandair munu halda áfram að vinna saman að rannsóknum og öflugu starfsnámi fyrir nemendur HR. Ari Kristinn Jónsson, rektor HR, og Bogi Nils Bogason, forstjóri Icelandair Group skrifuðu undir samstarfssamning á dögunum þess efnis.

Brautskráning fyrsta nemendahóps sem stundaði meistaranám samkvæmt nýju skipulagi fór fram í Háskólanum í Reykjavík á dögunnum. Meistaranám í viðskiptadeild HR er nú þrjár annir og tekur 14 mánuði að ljúka. Flestir nemendurnir sem útskrifuðust hófu nám haustið 2018.

Þegar fólk vill ráðast í kaup á fasteign og sækja um lán fyrir henni er venjulega leiðin til að meta greiðsluhæfni þess að sjá yfirlit yfir reikninga og laun. Það eru þó um tveir milljarðar manna í heiminum sem hafa ekki bankareikninga og hafa því ekki aðgang að fjármagni.

Nemendur Háskólans í Reykjavík létu til sín taka í frumkvöðlakeppni Icelandic Startups, Gullegginu, í ár. Lokahóf keppninnar var haldið í Sólinni í HR síðasta föstudag. Í ár bárust 135 hugmyndir auk þess sem 20 einstaklingar skráðu sig til leiks án hugmyndar og áttu þess kost að taka þátt í verkefnum annarra.

Lilja Alfreðsdóttir, mennta- og menningarmálaráðherra, Hafrún Kristjánsdóttir, deildarforseti íþróttafræðideildar Háskólans í Reykjavík og Íris Róbertsdóttir, bæjarstjóri Vestmannaeyjabæjar, undirrituðu í dag samning um nám í íþróttafræði á háskólastigi við HR sem kennt verður í Vestmannaeyjum.

Kennarar við Háskólann í Reykjavík láta til sín taka í nýsköpun í kennslu en meðal þróunarverkefna þeirra eru raddstýrt kennsluefni, myndbönd um mikilvægi eðlisfræði, rafrænt námsefni í dönsku, gagnvirkt kennsluefni og notkun snjallsíma sem kennslutækis.

Búið er að opna fyrir umsóknir í nýtt þriggja anna nám í Háskólagrunni HR. Hingað til hefur verið hægt að sækja um í tvær mismunandi námsleiðir: Háskólagrunn sem er eitt ár að lengd og viðbótarnám við stúdentspróf. Nú verður hægt að ljúka Háskólagrunninum á annað hvort einu ári eða þremur önnum.

Landsvirkjun og Háskólinn í Reykjavík hafa endurnýjað samstarfssamning um að efla menntun og rannsóknir á nýtingu endurnýjanlegrar raforku og áhrifum hennar á umhverfi og samfélag. Samningurinn felur m.a. í sér að Landsvirkjun verður meðal stofnaðila að nýju rannsóknasetri um sjálfbærni við háskólann, sem mun sinna sjálfstæðum rannsóknum á endurnýjanlegri orku og nýtingu hennar.

Samrómur er heiti samvinnuverkefnis sem snýr að því að safna röddum til að búa til opið gagnasafn fyrir notkun á íslensku í upplýsingatækni. Verkefninu var hleypt af stokkunum í gær, þann 16. október, á málþinginu Er íslenskan góður „bissness“? Við það tækifæri lögðu þau Guðni Th. Jóhannesson, forseti Íslands, Vigdís Finnbogadóttir, fyrrverandi forseti, Lilja Alfreðsdóttir, mennta- og menningarmálaráðherra og Halldór Benjamín fyrst allra sínar raddir til söfnunarinnar. Um miðjan dag þann 17. október, eða um sólarhring eftir að söfnunin hófst, er þegar búið að safna 1346 röddum.

Ragnhildur Helgadóttir var sæmd heiðursdoktorsnafnbót við Háskólann í Bergen 15. október. Af því tilefni hélt hún hátíðarfyrirlestur í háskólanum þar sem hún fjallaði um hlutverk dómstóla er þeir meta hvort lög samrýmist stjórnarskrá. Ragnhildur er sviðsforseti samfélagssviðs HR en innan þess starfa lagadeild, viðskiptadeild, sálfræðideild og íþróttafræðideild. Hún er formaður vísindanefndar Vísinda- og tækniráðs, hefur dæmt mál í Hæstarétti, héraðsdómi og í Mannréttindadómstól Evrópu og gegnt ýmsum trúnaðarstörfum.

Pálmi er nemi í tölvunarfræði með viðskiptafræði sem aukagrein. Hann langaði að takast á við áskorun og skráði sig í skiptinám í Jórdaníu, í Jordan University of Science and Technology. „Mig langaði í skiptinám á sterum ef svo má segja! Ég vissi að ég myndi seint geta dvalið á svona stað með alla þá aðstoð sem ég var með sem skiptinemi; styrki, úrræði og sjálfboðaliða frá staðnum til að hjálpa mér - þannig að ég vissi að þetta tækifæri var ómetanlegt. En ég viðurkenni fúslega að ég vissi lítið um þetta umhverfi sem ég var kominn í.“

Gæðaráð íslenskra háskóla birti nýverið niðurstöður gæðaúttektar á Háskólanum í Reykjavík. Helstu niðurstöður eru þær að háskólinn vinni samkvæmt skýrri stefnu sem taki mið af þörfum íslensks samfélags til framtíðar, bjóði upp á námsframboð sem henti nemendum og íslensku atvinnulífi og góður og hvetjandi starfsandi sé ríkjandi meðal nemenda og starfsfólks.

Þrívíddarprentað líkan af hjarta manns sem hlotið hafði alvarlegan hjartaskaða, bjargaði lífi hans. Háskólinn í Reykjavík og Landspítalinn hafa um árabil unnið náið saman við þróun á þrívíddarprentun líffæra sem notuð eru við undirbúning skurðaðgerða.

Fjármálaheimurinn er að breytast ört ekki síst vegna fjártæknilausna (FinTech) sem brjóta upp hefðbundið fjármálaumhverfi. Fjártækni miðar m.a. að því að veita notendum betri þjónustu, einfalda greiðslukerfi og auka gagnsæi.

NH100 ehf. hefur tekið við veitingarekstri í Bragganum, en fyrri rekstraraðili, Víkin veitingar ehf., sagði upp samningi um rekstur Braggans í vor. Nýir rekstraraðilar hyggjast leggja aukna áherslu á að Bragginn verði félagsaðstaða fyrir nemendur HR og munu eiga náið samstarf við Stúdentafélag HR og bjóða upp á fjölbreytta viðburði í samstarfi við nemendur.

Nemendur sem náðu framúrskarandi árangri í námi á síðustu önn voru afhentar viðurkenningar í gær, fimmtudaginn 26. september. Athöfnin var haldin í Sólinni í HR venju samkvæmt og var vel sótt af nemendum og aðstandendum þeirra.

„Nemendurnir stóðu sig afar vel og lögðu mikla alúð í hópstarfið og vangaveltur. Þau fengu þetta stóra og óljósa verkefni í fangið og var í rauninni hent út í djúpu laugina. Þau tóku ákvarðanir um hvaða þætti þau vilduð leysa og útfærðu lausnir. Það var gaman að hlusta á kynningarnar, enda oft frábærar hugmyndir og útpældar útfærslur, og augljóslega heilmikil vinna sem lá að baki.“

„Snjallt raforkukerfi er hannað þannig að það getur lagað sig sjálft. Kerfið er stutt af háþróuðu varnarkerfi með gagnvirkri stýringu. Þetta gerir aðlögun kerfisins að öðrum endurnýjanlegum orkugjöfum einnig auðveldari. Þessi nýju kerfi uppgötva sjálf bilanir mun fyrr, eða mögulegar bilanir, og geta endurstillt sig án þess að mannshöndin þurfi að koma þar nærri. Að því leyti er kerfið „snjallt““.

Á nýjum lista Times Higher Education (THE) yfir bestu háskóla heims, sem birtur var í gær, kemur fram að á mælikvarða sem metur áhrif rannsókna, skorar Háskólinn í Reykjavík hæst, ásamt sex öðrum háskólum. Áhrifin eru metin út frá hlutfallslegum fjölda tilvitnana í vísindagreinar, það er, hversu oft aðrir vísindamenn vitna í niðurstöður fræðimanna háskólans í ritrýndum vísindagreinum.

Eiríkur Elís Þorláksson hefur verið ráðinn forseti lagadeildar Háskólans í Reykjavík.

Verðlaun Háskólans í Reykjavík voru afhent í gær, föstudag. Verðlaunin hljóta þeir starfsmenn háskólans sem þykja hafa skarað fram úr í rannsóknum, kennslu og þjónustu. Verðlaunin á ár hlutu Ólafur Eysteinn Sigurjónsson, prófessor við verkfræðideild; Olivier Matthieu S. Moschetta, lektor við verkfræðideild og Einar Magnússon, starfsmaður í yfirsetu prófa.

Bygging Háskólagarða Háskólans í Reykjavík við Nauthólsveg gengur mjög vel og samkvæmt áætlunum, samkvæmt Hákoni Erni Arnþórssyni, verkefnastjóra Háskólagarða HR.

Í dag undirrituðu Almannarómur – Miðstöð um máltækni og rannsóknarhópurinn SÍM (Samstarf um íslenska máltækni) samning um smíði innviða í máltækni fyrir íslensku og fór undirritun fram í Vigdísarstofu í Veröld, húsi Vigdísar. Í SÍM eru níu fyrirtæki og stofnanir með sérþekkingu á sviði málvísinda og máltækni.

Íslensk fyrirtæki þurfa að byrja að hugsa hlutina upp á nýtt, en á hinum Norðurlöndunum standa fyrirtæki framar í nýsköpun og stafrænum umskiptum. Þetta var meðal þess sem kom fram á hádegisfundi viðskiptadeildar Háskólans í Reykjavík og Félags viðskipta- og hagfræðinga, sem bar heitið Leadership and Digitalization, síðastliðinn fimmtudag.

Í dag var fyrsti skóladagurinn fyrir nýnema við Háskólann í Reykjavík. Glæsilegur hópur ungmenna mætti á nýnemadaginn til að hitta kennara sína og samnemendur, þiggja léttar veitingar og fá kynningu á aðstöðunni og þjónustunni í HR, félagslífinu og ýmsu því sem skiptir máli varðandi það að hefja nám í háskóla.

HR-ingurinn, stærsta LAN-mót landsins var haldið í HR um síðustu helgi. Það er nemendafélag tölvunarfræðideildar, Tvíund, sem stendur fyrir keppninni

RU Racing tók þátt í fjórða sinn í alþjóðlegu Formula Student keppninni í júlí sl. Liðið var stofnað í HR árið 2015 og samanstendur af nemendum úr öllum deildum Háskólans í Reykjavík. Meðlimir þess hanna og smíða Formúlubíl á hverju ári innan veggja háskólans með það að markmiði að gera bílinn léttari, kraftmeiri og áreiðanlegri en þann sem gerður var árinu á undan.

Þessar vikurnar standa yfir í nágrenni Langjökuls prófanir í tengslum við svonefnt SAND-E verkefni sem kostað er af Bandarísku flug- og geimvísindastofnuninni, NASA. Megintilgangur verkefnisins er að prófa vél- og hugbúnað fyrir Mars-jeppa, sem nota á í leiðangri NASA til Mars árið 2020, við aðstæður sem líkjast aðstæðum á Mars.

Háskólinn í Reykjavík (HR) er í 52. sæti á nýjum lista Times Higher Education yfir 100 bestu ungu háskóla í heimi (Young Universities Ranking).

Raungreinaverðlaun Háskólans í Reykjavík voru veitt 24 nýstúdentum um allt land á liðnu vori. Verðlaunin hljóta þeir stúdentar sem sýna framúrskarandi árangur í raungreinum á stúdentsprófi. 

Háskólinn í Reykjavík brautskráði 627 nemendur við hátíðlega athöfn í Hörpu í gær, laugardaginn 22. júní.

Nemendum Háskólans í Reykjavík gafst færi á að ferðast ókeypis til Frakklands í febrúar og mars til að læra ákvörðunarfræði á nýjan og spennandi hátt í alþjóðlegu umhverfi hafnarbæjarins Brest í Bretagnehéraðinu. Auk nemenda frá HR tóku franskir og skoskir nemendur þátt.

Marta Kristín Lárusdóttir, dósent við tölvunarfræðideild, mun næstu þrjú árin vinna að rannsókn sem miðar að því að bæta stafrænt vinnuumhverfi. Hún vinnur að rannsókninni ásamt Åsa Cajander sem er prófessor við Háskólann í Uppsala í Svíþjóð. Þær eru báðar meðlimir rannsóknarhópsins Health,Technology and Organisation, við Uppsala háskóla.

Ríflega 3.300 umsóknir hafa borist um nám við Háskólann í Reykjavík fyrir haustönn 2019. Það er um 10% fjölgun á umsóknum milli ára. Reiknað er með að um 1500 nemendur hefji nám við háskólann í haust. Enn er opið fyrir umsóknir um nám í Háskólagrunni HR, iðn- og tæknifræðideild og einstakar brautir í meistaranámi.

Nýr kappakstursbíll, RU19, sem smíðaður var af nemendum í Háskólanum í Reykjavík var sýndur í HR í gær, miðvikudag. Hópur nemenda Háskólans í Reykjavík mun keppa á bílnum í Hollandi í sumar.

Skipulagi Háskólans í Reykjavík var breytt á vordögum. Nú eru tvö ný svið við háskólann en undir þeim sex akademískar deildir í stað fjögurra áður. Sviðin heita samfélagssvið og tæknisvið, undir því fyrra eru lagadeild, viðskiptadeild, íþróttafræðideild og sálfræðideild en undir því síðara tölvunarfræðideild, verkfræðideild og iðn- og tæknifræðideild.

62 nemendur brautskráðust á föstudaginn síðastliðinn, 7. júní, úr Háskólagrunni HR frá frumgreinadeild háskólans. 18 nemendur brautskráðust af tækni- og verkfræðigrunni deildarinnar, 32 af laga- og viðskiptagrunni og 12 af tölvunarfræðigrunni. Til viðbótar luku 20 nemendur viðbótarprófi við stúdentspróf.

Þann 17. maí síðastliðinn hlaut dr. Helgi Þór Ingason, prófessor við verkfræðideild og forstöðumaður MPM-námsins, heiðursviðurkenningu frá IPMA - Alþjóðasamtökum verkefnastjórnunarfélaga.

Háskólinn í Reykjavík hefur umsjón með stjórn nýs samstarfsverkefnis á sviði nýsköpunar, orku, sjálfbærni og loftslagsmála en HR, ferðamála-, iðnaðar- og nýsköpunarráðherra, Orkuklasinn og GRP ehf. skrifuðu á dögunum undir samstarfssamning um ofangreint. Samstarfsverkefnið er vistað hjá Orkuklasanum.

16 nemendur luku nýlega fyrsta sumarskóla Háskólans í Reykjavík og University of Southern Maine (USM) en hann var haldinn í HR dagana 19. - 29. maí. Sumarskólinn er hluti af samstarfi háskólanna tveggja í kennslu og rannsóknum en viðfangsefni hans eru leiðtogafærni og stjórnun nýsköpunar. Í ár var áherslan á sjálfbæra ferðamennsku á Íslandi. Hópurinn samanstóð af íslenskum og bandarískum nemendum.

Dr. Bjarni Már Magnússon hefur hlotið framgang í stöðu prófessors við lagadeild Háskólans í Reykjavík. Bjarni lauk doktorsprófi frá lagadeild Edinborgarháskóla árið 2013, LL.M.-gráðu í haf- og strandarétti frá lagadeild Miami-háskóla árið 2007 og öðlaðist lögmannsréttindi árið 2008. Hann lauk embættisprófi í lögfræði frá Háskóla Íslands árið 2005 og M.A.-gráðu í alþjóðasamskiptum frá sama skóla árið 2007.

Dagurinn Stelpur og tækni var haldinn í Háskólanum í Reykjavík þann 22. maí síðastliðinn. Þar er Stelpum úr 9. bekk grunnskóla boðið í HR, þar sem þær taka þátt í fjölbreyttum vinnustofum, og tæknifyrirtæki. Hjá fyrirtækjunum taka konur sem þar starfa á móti hópunum og gefa innsýn í starfsemina og þau tækifæri sem stelpum bjóðast á vinnumarkaði að loknu tækninámi.

Fulltrúar Háskólans í Reykjavík, Samtaka iðnaðarins, Tækniskólans, Iðunnar fræðsluseturs og Rafmenntar skrifuðu í dag undir viljayfirlýsingu um samstarf um að kortleggja, efla og kynna tækifæri á háskólanámi með atvinnutengd lokamarkmið, eftir iðnnám og aðra starfsmenntun.

Vinnusmiðja í Nýsköpunarkeppni grunnskólanna 2019 var haldin í Háskólanum í Reykjavík í vikunni. Nýsköpunarkeppni grunnskólanna (NKG) er keppni í nýsköpun fyrir 5. – 7. bekk grunnskólanna og hefst á hverju hausti. Í vinnusmiðjuna að vori eru valdir þátttakendur til að útfæra sínar hugmyndir með aðstoð leiðbeinenda. Þessir nemendur komast í gegnum strangt matsferli þar sem uppfinningar þeirra eru metnar með tilliti til hagnýti, nýnæmi og markaðshæfi.

Hafliði Stefánsson er nemandi í Háskólagrunni HR. Hann stefnir á tölvunarfræðinám við HR að loknu námi í Háskólagrunni. Hann segir námið gefa góðan undirbúning fyrir háskólanám enda hefur hann þurft að stíga út fyrir þægindarammann.

Námskeiðinu Nýsköpun og stofnun fyrirtækja lauk á föstudaginn með lokahófi þar sem vinningslið hlutu verðlaun og nemendurnir fengu tækifæri til að gleðjast saman yfir afrakstri síðustu þriggja vikna.

Vísindamenn eru væntanlegir til landsins í sumar til að prófa sjálfkeyrslubúnað fyrir næstu ferð NASA til Mars. Þeir njóta liðsinnis háskólanema við Háskólann í Reykjavík við undirbúning prófana á búnaðinum. Þær verða gerðar í Lambahrauni, norðan við Hlöðufell, en þar svipar jarðvegi og landslagi til þess sem fyrirfinnst á Mars.

Með haustinu geta nemendur, starfsfólk og gestir Háskólans í Reykjavík yljað sér á ilmandi kaffibolla og gætt sér á sérvöldu meðlæti í nýju kaffihúsi Kaffitárs sem mun opna í Sólinni í háskólanum í ágúst.

Innan HR hefur alltaf verið lögð áhersla á að nemendur kunni að fylgja hugmyndum sínum eftir og stofna fyrirtæki. Meðal annars með þessu námskeiði sem nú stendur yfir sem heitir Nýsköpun og stofnun fyrirtækja, og er þriggja vikna verklegt námskeið og skylda fyrir flesta grunnnema. Þar að auki geta meistaranemar við HR valið að útskrifast með áherslu á nýsköpun og frumkvöðlafræði, þvert á deildir.

Þetta eru meðal umfjöllunarefna nemenda í MPM-námi, meistaranámi í verkefnastjórnun við HR, í námskeiðinu Verkefni í þágu samfélags.

Brynhildur Birgisdóttir, framleiðandi hjá Pegasus, hélt fróðlegt erindi á vegum MPM-námsins, meistaranáms í verkefnastjórnun, síðasta föstudag í HR. Pegasus hefur séð um tökur á þáttunum Game of Thrones hér á landi og Brynhildur hafði frá mörgu um þetta stóra verkefni að segja, enda um margt einstakt.

Háskólinn í Reykjavík varð í dag fyrsti háskóli landsins til að hljóta jafnlaunavottun. Jafnlaunavottunin er staðfesting á því að unnið sé markvisst gegn kynbundnum launamun innan háskólans, að ákvarðanir í launamálum feli ekki í sér kynbundna mismunun og að jafnlaunakerfi háskólans standist kröfur jafnlaunastaðals.

Á lokaári sínu í námi vinna MBA-nemar lokaverkefni þar sem þeir þurfa að nýta þá þekkingu sem þeir hafa öðlast í gegnum allt námið, sem er samtals tvö ár. Nemendur þurfa að líta til allra atriða í rekstri og er lokaverkefnið unnið í samstarfi við fyrirtæki eða stofnun. Flest þeirra varða stefnumótun með nokkuð háu flækjustigi eins og þátttöku á nýjum markaði.

Times Higher Education hefur í fyrsta skipti birt lista yfir hvaða háskólar í heiminum hafa mest jákvæð áhrif á samfélagið, út frá sjálfbærnimarkmiðum Sameinuðu þjóðanna. Háskólinn í Reykjavík er í sæti 101-200 á listanum.

HR fær sérstaklega góða einkunn fyrir fimmta sjálfbærnimarkmiðið, Jafnrétti kynjanna sem snýr að því að tryggja jafnrétti kynjanna og styrkja stöðu kvenna og stúlkna. Þar er HR í 59. sæti.

Hvernig hús ætlum við að byggja á Mars? Hvernig fötum verða fyrstu áhafnirnar sem ferðast þangað? Það er bráðnauðsynlegt að fá hönnuði að borðinu þegar reynt er að leysa slík verkefni. Hönnuðir nálgast vandamálin á annan hátt en vísindamenn og finnst það kostur að vita sem minnst um viðfangsefnið þegar hafist er handa, þannig sé hægt að vera opinn fyrir því að hugsa málin upp á nýtt og finna bestu lausnina.

Í Stjórnunarkeppni framhaldsskólanna keppa þriggja til fjögurra manna lið í að stýra fyrirtæki í ákveðinn tíma með sem bestum árangri. Mikilvægur hluti af starfi stjórnenda er að taka ákvarðanir, bæði um atriði í starfsemi frá degi til dags og stærri ákvarðanir sem hafa áhrif á starfsemina, og samfélagið allt, til frambúðar

Næsta haust mun fyrsti árgangur í nýju MSc-námi í hagnýtri atferlisgreiningu setjast á skólabekk við sálfræðideild Háskólans í Reykjavík. Námið er það fyrsta sinnar tegundar á Íslandi. Boðið er upp á nýtt meistaranám í hlutanámi sem gefur þeim nemendum sem það kjósa tækifæri til að sameina nám og hlutastarf á vettvangi. 

Eyrún Engilbertsdóttir útskrifaðist í febrúar síðastliðnum með BSc-gráðu í hátækniverkfræði frá HR. Fyrir áramót sá hún auglýsingu um áhugaverða ferð í kennslukerfi háskólans. „Það var einfaldlega tilkynnt um að hægt væri að sækja um styrk til Japansferðar.“ Hún ákvað að sækja um.

Forritunarkeppni framhaldsskólanna var haldin síðastliðin laugardag í Háskólanum í Reykjavík en það er tölvunarfræðideild sem stendur fyrir henni. Fjöldi ungmenna hvaðanæva að á landinu mættu til keppni og létu hvassviðrið ekki aftra sér. Liðin sem taka þátt geta verið skipuð 1-3 framhaldsskólanemum.

Háskólinn í Reykjavík vinnur markvisst að því að minnka kynjahalla í ákveðnum námsgreinum og starfsemi háskólans er orðin umhverfisvænni. Þetta kemur fram í nýrri skýrslu HR sem tengist þátttöku hans í PRME, verkefni Sameinuðu þjóðanna menntun ábyrgra leiðtoga.

Tveir nemendur við Háskólann í Reykjavík hlutu hvatningarviðurkenningar á Nýsköpunarmóti Álklasans sem haldið var nýlega í hátíðarsal Háskóla Íslands. Caroline Mary Medion hlaut viðurkenningu fyrir rannsókn sína  Improving Current Efficiency in L-T Aluminum Electrolysis with Vertical Inert Electrodes. Eymar Andri Birgisson hlaut viðurkenningu fyrir verkefni sitt Sjálfvirknivæðing á kerviðgerðum með tölvusjón.

Eydís Huld Magnúsdóttir varði fyrir stuttu doktorsverkefni sitt frá tækni- og verkfræðideild Háskólans í Reykjavík. Markmið rannsóknar hennar var að fylgjast með huglægu vinnuálagi hjá einstaklingum sem starfa í ábyrgðarmiklum störfum, s.s. flugumferðar- og flugstjórn, með það að markmiði að hafa jákvæð áhrif á jafnt árangur, líðan þeirra og síðast en ekki síst öryggi þeirra og öryggi almennings. 

Nemendur við Háskólann í Reykjavík (HR) opnuðu í dag nýtt frumkvöðlasetur HR í Nauthólsvík sem hlotið hefur nafnið Seres. Í Seres - frumkvöðlasetri HR er sérhönnuð aðstaða fyrir núverandi og útskrifaða HR-inga til að hrinda hugmyndum sínum í framkvæmd.

Áhugasamir framtíðarnemendur fylltu stofur í opnum tímnum í grunnnámi við Háskólann í Reykjavík á Háskóladaginn sem var haldinn í HR, og fleiri háskólum, síðastliðinn laugardag. Á Háskóladaginn kynna allir háskólar landsins námsframboð sitt í húsakynnum HR, HÍ og LHÍ.

Verðlaun Eðlisfræðifélags Íslands voru veitt á aðalfundi félagsins síðastliðinn föstudag. Félagið hefur undanfarin ár veitt hvatningarverðlaun fyrir bestan árangur í eðlisfræðinámskeiðum á fyrsta ári, bæði fyrir nemendur í Háskóla Íslands og Háskólanum í Reykjavík.

Gögn frá Rannsóknarþjónustu Háskólans í Reykjavík sýna að rannsóknastarf innan háskólans er mun öflugra nú en fyrir rúmlega áratug. Meðal annars hefur heildarstyrkupphæð til HR úr innlendum samkeppnissjóðum fimmfaldast. Rannsóknastyrkur háskólans var staðfestur á lista Times Higher Education árið 2018.

Forsetalistaathöfn HR var haldin í gær, þriðjudag. Við athöfnina eru nemendur verðlaunaðir fyrir framúrskarandi árangur í námi og hljóta þar með styrki sem nema niðurfellingu skólagjalda næstu annar. 

Sérvalið teymi frá viðskiptadeild HR tók þátt í Rotman International Trading Competition sem haldin var í Toronto, Kanada í síðustu viku og stóð sig með prýði.

Lið frá lagadeild HR bar sigur úr býtum í landsútsláttarkeppni í Lissabon og er á leið út til Washington að keppa fyrir Íslands hönd í hinni alþjóðlegu Phillip C Jessup málflutningskeppni

Nemendur og starfsfólk Háskólans í Reykjavík geta nú hlaðið rafmagnsbíla sína í tólf hleðslustæðum sem búið er að koma upp við háskólann í samstarfi við Hlaða ehf.

Nýsköpunarverðlaun forseta Íslands voru afhent við hátíðlega athöfn á Bessastöðum í dag, miðvikudag. Verðlaunin í ár hlutu þau Hanna Ragnarsdóttir, nemi við tölvunarfræðideild HR, Eysteinn Gunnlaugsson, meistaranemi í tölvunarfræði við KTH í Svíþjóð og Heiðar Már Þráinsson og Róbert Ingi Huldarsson, nemar á verkfræði- og náttúruvísindasviði HÍ.

Háskólinn í Reykjavík og Landsnet hafa skrifað undir samstarfssamning til fimm ára um menntun og rannsóknir á sviði flutnings og vinnslu endurnýjanlegrar raforku. Landsnet verður, samkvæmt samningnum, stofnaðili að nýju Rannsóknarsetri HR um sjálfbærni (RU Research Center on Sustainability).

Vísindamenn við sálfræðisvið Háskólans í Reykjavík hófu nýlega viðamikla langtíma rannsókn á geðheilsu karla og kvenna á Íslandi. Það eru dr. Bryndís Björk Ásgeirsdóttir, dósent og sviðsstjóri sálfræðisviðs HR, dr. Rannveig S. Sigurvinsdóttir, lektor við sálfræðisvið, Þóra Sigfríður Einarsdóttir, doktorsnemi við sviðið, ásamt Söruh E. Ullman, prófessor í afbrotafræði og sálfræði við Háskólann í Illinois, sem standa að rannsókninni. Verndari hennar er Guðni Th. Jóhannesson, forseti Íslands.

258 nemendur voru brautskráðir frá Háskólanum í Reykjavík við hátíðlega athöfn í Hörpu á laugardaginn, 2. febrúar. 182 nemendur voru brautskráðir úr grunnnámi, 72 úr meistaranámi og fjórir úr doktorsnámi.

Úrslit Hnakkaþonsins 2019 voru kynnt í Háskólanum í Reykjavík síðasta laugardag. Hnakkaþon er útflutningskeppni sjávarútvegsins og er haldin árlega í samstarfi Háskólans í Reykjavík og Samtaka fyrirækja í sjávarútvegi. Í ár var það liðið Coot – What a catch! sem sigraði í keppninni.

Á dögunum var tilkynnt um úthlutun Rannís úr Rannsóknasjóði til nýrra rannsókna­verkefna fyrir árið 2019 en á meðal styrkþega eru fjölmargir vísindamenn frá Háskólanum í Reykjavík.

 „Einstaklingsmiðuð læknismeðferð er það sem koma skal,“ segir Dr. Paolo Gargiulo, dósent við tækni- og verkfræðideild og forstöðumaður Taugalífeðlisfræðistofnunar Háskólans í Reykjavík. Hann er verkefnastjóri íslenska hluta rannsóknaverkefnisins RESTORE  sem hlaut nú um áramótin 5,5 milljón evra styrk, jafngildi um 750 milljóna íslenskra króna, úr Horizon 2020-áætlun Evrópusambandsins.