Fréttir eftir árum


Fréttir

Greiningarbúnaður fyrir höfuðhögg íþróttafólks hlýtur Guðfinnuverðlaunin 2021

Yfir 600 nemendur Háskólans í Reykjavík spreyta sig á fjölbreyttum nýsköpunarverkefnum

19.5.2021

Undanfarnar þrjár vikur hafa nemendur Háskólans í Reykjavík spreytt sig á fjölbreyttum nýsköpunarverkefnum í námskeiðinu Nýsköpun og stofnun fyrirtækja. Um er að ræða fjölmennasta nýsköpunarátak landsins, en námskeiðið sækja nær allir nemendur HR í lok fyrsta árs. Það felst í því að setja fram og þróa nýja hugmynd að vöru eða þjónustu, gera fjárhagsáætlun, fara í gegnum hönnunarsprett, prófa vöruna og fjármagna hana. Nemendahópar keppa sín á milli um best útfærðu hugmyndina og hlýtur hún Guðfinnuverðlaunin. Í ár varð verkefnið SEIFER hlutskarpast, sem er búnaður til að meta og skrá höfuðhögg íþróttamanna.

Verðlaunahugmyndirnar

Í lok námskeiðsins voru þrjár bestu hugmyndirnar valdar en þær þurfa að hafa verið útfærðar með góðri viðskiptaáætlun og notendaprófunum. Hópurinn í fyrsta sæti hlýtur að verðlaunum kr. 500.000.- sem nýta má til að þróa hugmyndina áfram, auk þess að hljóta Guðfinnuverðlaunin svokölluðu.

Guðfinnuverðlaunin 2021 fær teymið Seifer. Það skipa Bjarki Fannar Snorrason, Bríet Eva Gísladóttir, Davíð Andersson og Guðrún Inga Marinósdóttir.

Á mynd: Bjarki Fannar Snorrason, Bríet Eva Gísladóttir, Davíð Andersson og Guðrún Inga Marinósdóttir.

1. sæti: Seifer

SEIFER búnaðurinn er notaður til upplýsingasöfnunar við höfuðhögg íþróttafólks. Búnaðurinn inniheldur hreyfi- og hröðunarnema sem mæla meðal annars höggkraft, hröðun og horntíðni höfuðhöggsins. Upplýsingar úr nemunum hjálpa til með að meta alvarleika höggsins og flýta greiningu á mögulegum heilahristingi. Með auðveldari greiningu getur íþróttamaður sem verður fyrir heilahristingi hafið bataferli strax og þannig minnkað líkur á langvarandi afleiðingum.

Teymið: Bjarki Fannar Snorrason, Bríet Eva Gísladóttir, Davíð Andersson og Guðrún Inga Marinósdóttir.

2. sæti: Help!

Help! er nýtt og betra bjöllukerfi fyrir heilbrigðisstofnanir sem kemur í veg fyrir að önnum kafið starfsfólk þurfi að svara beiðnum sjúklinga án þess að vita hvers eðlis aðstoðarbeiðnin er. Með Help! hugbúnaðinum geta sjúklingar kallað eftir nákvæmlega þeirri aðstoð sem þeir þurfa og starfsfólk veit hvað á að mæta með á vettvang, hversu áríðandi verkið er og hversu mikið vinnuafl þarf. Help! er einfalt og hentar öllum aldurshópum.

Teymið: Ásgeir Örn Jóhannsson, Ólafur Þorsteinn Skúlason, Óliver Haraldsson, Sigríður Þórunn Ragnarsdóttir og Unnur Ósk Gunnlaugsdóttir.

3. sæti: VÆR

VÆR er kolsýrður drykkur með náttúrlegum bragðefnum og CBD olíu. CBD er eitt af virku efnunum í hamp plöntunni , en er ekki vímugjafi, heldur bætir heilsu. Varan er fyrir fólk á aldrinum 25-50 ára, íþróttafólk, fólk sem upplifir streitu og kvíða og fyrir fólk með ADHD.

Teymið: Axel Aage Schiöth, Birgir Snævarr Ásþórsson, Harpa Ægisdóttir og Heiðar Sigurjónsson.

Hrefna Sigríður Briem, forstöðumaður grunnnáms í viðskiptadeild, hefur haft umsjón með námskeiðinu um árabil. Í ár stýrði Svava Björk Ólafsdóttir, stofnandi RATA, námskeiðinu ásamt Hrefnu. Aðstoðarkennarar voru Gabríela Jóna Ólafsdóttir, Haraldur Hugoson, Dóróthea Ármann og Einar Þór Gústafsson. Auk þess kom landsliðið í nýsköpun að námskeiðinu sem gestakennarar, meðal annars: Guðmundur Hafsteins stofnandi Fraktal, Davíð Helgason stofnandi Unity, Hilmar Veigar Pétursson stofnandi CCP, Stefanía Ólafsdóttir, stofnandi Avo, Hjálmar Gíslason stofnandi GRID, Elísabet Grétarsdóttir frá EA Games, Óskar Þórðarson stofnandi Omnom, Viggó Ásgeirsson stofnandi Meniga og Magnús Scheving stofnandi Lazy town. Reyndir frumkvöðlar og stuðningsaðilar og fjárfestar í frumkvöðlaumhverfinu tóku einnig virkan þátt sem mentorar, dómarar og gestafyrirlesarar og má þar nefna aðila frá Crowberry Capital, Icelandic Startups, Poppins and Partners, Nox Medical, Senza, Frumkvöðlum, Marel, Kviku eignastýringu, Hugverkastofu, Össurri, Íslandsstofu, Eimi, Brunnur Ventures og Eldstæðinu.