Fréttir eftir árum


Fréttir

Hafragrautaruppáhellarinn og snagi sem má hækka og lækka meðal hugmynda

24.5.2019

Vinnusmiðja í Nýsköpunarkeppni grunnskólanna 2019 var haldin í Háskólanum í Reykjavík í vikunni. Nýsköpunarkeppni grunnskólanna (NKG) er keppni í nýsköpun fyrir 5. – 7. bekk grunnskólanna og hefst á hverju hausti. Í vinnusmiðjuna að vori eru valdir þátttakendur til að útfæra sínar hugmyndir með aðstoð leiðbeinenda. Þessir nemendur komast í gegnum strangt matsferli þar sem uppfinningar þeirra eru metnar með tilliti til hagnýti, nýnæmi og markaðshæfi.

Nyskopunarkeppni-grunnskolanna2019-2-Hópurinn sem hlaut viðurkenningar ásamt aðstandendum keppninnar.

Að vinnusmiðju lokinni eru veitt verðlaun fyrir hugmyndir sem þóttu skara fram úr og í ár afhentu forseti Íslands, Guðni Th. Jóhannesson og Lilja Alfreðsdóttir, mennta- og menningarmálaráðherra  viðurkenningarnar.

Úrslit

1. sæti: Hafragrautaruppáhellari

Anna Valgerður Árnadóttir og Oliwia Huba, Brekkubæjarskóla á Akranesi.

2. sæti: Hækka-Lækkari, snagi sem hægt er að hækka og lækka (fyrir börn)

Rakel Sara Þórisdóttir, Seljaskóla í Reykjavík.

3. sæti: Hólfið, hólfaskiptur brúsi

Ásgeir Máni Ragnarsson, Brúarásskóla í Fljótsdalshéraði.

Forritunarbikarinn

hlutu Ingunn Lilja Arnórsdóttir og Kamilla Rós Gústafsdóttir með stærðfræðitímaappið. Eftir ákveðinn langan tíma læsist sími hjá barninu og þarf barnið að leysa nokkur stærðfræðidæmi við hæfi til að geta haldið áfram í símanum. Þær koma frá Flúðaskóla, Flúðum.

Hönnunarbikarinn

hlaut Hera Sjöfn Bjartsdóttir með Tannþráðar-tannburstann, en með honum er tannþráður áfastur á tannburstanum. Hún kemur frá Hofsstaðaskóla í Garðabæ.

Samfélagsbikarinn

hlutu Ívar Logi Jóhannsson og Kristófer Bjarki Hafþórsson með Hjólastól sem hægt er að halla bakinu á. Þeir koma frá Egilsstaðaskóla.

Tæknibikarinn

hlutu þær Hekla Karlsdóttir Roth og Helena Huld Hafsteinsdóttir með Bílastopparann, sem á að stuðla að umferðaröryggi. Þær koma frá Vesturbæjarskóla í Reykjavík.

Umhverfisbikarinn

hlaut Karitas Ingvadóttir fyrir hugmynd sína um Áfyllinginn, áfylliflöskur til að kaupa sjampó og hárnæringu í búðum. Þetta er umhverfisvænt og miðar að því að minnka plastnotkun. Karitas kemur frá Vesturbæjarskóla í Reykjavík.

Nyskopun-grunnskolanema2019-vinnustofaUngir frumkvöðlar í vinnustofunni en þar fá þátttakendur aðstoð við að útfæra hugmyndirnar og gera frumgerðir.

Um Nýsköpunarkeppni grunnskólanna

Keppnin var haldin í fyrsta skipti árið 1991 og var því haldin núna í 28. sinn. Yfir 1200 hugmyndir, frá 38 skólum víðs vegar af landinu, bárust að þessu sinni. Dómnefnd valdi 26 hugmyndir, sem 40 nemendur standa að baki, í vinnusmiðjuna. Í viðurkenningaskyni fyrir að komast í úrslit fengu allir nemendur gjafabréf í Háskóla unga fólksins 2019, gjafabréf frá IKEA eða gjafabréf í FabLab smiðju.

ELKO á Íslandi stóð síðan straum af veglegum vinningum fyrir aðalverðlaunin og voru þau ekki af verri endanum. Öll önnur sæti en það fyrsta fengu glæsilegan Samsung Galaxy síma að verðmæti 40.000 kr. Í fyrsta sæti voru verðlaunin Hp fartölva að verðmæti 140 þús.

Nyskopunarkeppni-grunnskolanna2019-1-Forseti Íslands er verndari keppninnar.