Fréttir eftir árum


Fréttir

Háskólinn í Reykjavík og Reykjavíkurborg skrifa undir samning um Borgarlínu

6.5.2020

Starfsfólk og nemendur Háskólans í Reykjavík munu geta farið í og úr Borgarlínu i yfirbyggðri stoppistöð í HR þegar fyrsti áfangi hennar verður að veruleika árið 2023. 

Borgarlínan mun tengja HR við áætlaða samgöngumiðstöð á BSÍ reitnum og veita nemendum og starfsfólki nýjan og umhverfisvænan valkost í samgöngum til og frá háskólanum. Frá HR mun Borgarlínan liggja yfir Fossvoginn á nýrri brú og í Hamraborg í Kópavogi. Stoppistöðin mun einnig nýtast öllum þeim sem nota nærliggjandi útivistarsvæði í Öskjuhlíð og Nauthólsvík.

Dagur B. Eggertsson, borgarstjóri og Ari K. Jónsson, rektor Háskólans í Reykjavík skrifuðu í dag undir samkomulag um stoppistöð vegna Borgarlínu við HR og aukið byggingamagn á lóð háskólans. Háskólinn í Reykjavík mun samkvæmt samkomulaginu fá aukið svigrúm til starfsemi á sviði þekkingar, rannsókna, hátækni og nýsköpunar á svæðinu. Útfærsla á byggingum á lóðinni mun fara fram samhliða breytingum á deiliskipulagi.

Mynd sem sýnir leið Borgarlínu um HR

Fyrsta innanhúss stoppistöð landsins

Dagur B. Eggertsson segir HR vera eina af lykilstoppistöðum í fyrsta áfanga Borgarlínu. „Háskólanemar geta þá nýtt sér hágæðaalmenningssamgöngur með fyrstu stoppistöðinni á landinu sem verður innanhúss en HR er ein af 26 stöðvum sem eru hluti af fyrsta áfanga Borgarlínu. Meðfram Borgarlínustöðvunum verður svo þétt og áhugaverð byggð. Eftir því sem fleiri búa nálægt háskólunum því færri hafa um langan veg að fara og þá minnkar umferðin. Samstarfið við HR hefur gengið ótrúlega vel enda mikill metnaður meðal stjórnenda, starfsfólks og nemenda að gera spennandi og lifandi háskóla- og þekkingarsamfélag að veruleika í kringum skólann.“

Ari K. Jónsson, rektor HR, segir: „Með Borgarlínu, Háskólagörðum HR sem við erum að opna í haust, og húsnæði til að stunda fjölbreytta nýsköpun styrkjum við til muna öflug háskólasvæði við rætur Öskjuhlíðar. Við erum þess vegna virkilega spennt fyrir því að þetta samkomulag sé í höfn og hlökkum til að halda áfram vinnu við þetta verkefni með borginni.“

Rektor HR og borgarstjóri standa hlið við hlið fyrir framan HRAri Kristinn Jónsson og Dagur B. Eggertsson skrifuðu undir samning um stoppistöð Borgarlínu og aukið svæði HR til nýbygginga í dag, 6. maí.