Fréttir eftir árum


Fréttir

HR, HÍ og LHÍ í samstarf við ráðstefnuborgina Reykjavík

11.4.2018

Rektorar Háskólans í Reykjavík, Háskóla Íslands og Listaháskóla Íslands skrifuðu undir samstarfssamkomulag við Ráðstefnuborgina Reykjavík (Meet in Reykjavík). Markmiðið með samkomulaginu er að fjölga alþjóðlegum akademískum fundum og ráðstefnum á vegum háskólanna hér á landi.

Hópur fólks stendur við höfnina í ReykjavíkRektorar HR, HÍ og LHÍ ásamt borgarstjóra og framkvæmdastjóra Meet in Reykjavík.

Þau Ari Kristinn Jónsson rektor HR, Jón Atli Benediktsson, rektor HÍ, og Fríða Björk Ingvarsdóttir, rektor LHÍ, undirrituðu samkomulagið ásamt Þorsteini Erni Guðmundssyni, framkvæmdastjóra Meet in Reykjavík, og Degi B. Eggertssyni, borgarstjóra.

Samkvæmt samningnum mun Meet in Reykjavík aðstoða starfsfólk háskólanna og samstarfsaðila þeirra við undirbúning, upplýsingaöflun og tilboðsgerð fyrir alþjóðlega fundi og ráðstefnur sem tengjast háskólunum með einhverjum hætti. Þá mun Meet in Reykjavík veita upplýsingar og halda kynningar um funda- og ráðstefnuaðstöðu háskólanna til alþjóðlegra samtaka og skipuleggjanda funda og ráðstefna.

Vekja athygli á íslenskum rannsóknum

Í umræðum í kjölfar undirritunar kom fram að á undanförnum árum hafi Ísland mótað sér ákveðna sérstöðu í jafnréttismálum, jarðvarma og málefnum norðurslóða. Þetta hafi meðal annars skilað sér í auknum áhuga á funda og ráðstefnuhaldi tengdum þessum málaflokkum hér á landi. Ísland hafi burði til þess að taka forustu í fleiri málaflokkum og samningurinn sé liður í því. Akademískar ráðstefnur séu öflug leið til þess vekja athygli á rannsóknarstarfi háskólanna, styrkja orðspor þeirra og mynda tengsl við erlenda fræðimenn. Þá hafa akademískar ráðstefnur vægi þegar kemur að uppröðun háskóla á alþjóðlega samanburðalista.    

Vilja byggja Reykjavík upp sem háskólaborg

Dagur B. Eggertsson borgarstjóri segir öfluga funda og ráðstefnuferðaþjónustu styðja við markmið borgarinnar um fjölbreytt og öflugt atvinnulíf. „Við viljum byggja upp borgina sem háskólaborg og sem þekkingarsamfélag. Umhverfi þar sem fyrirtæki hafi góð tækifæri til að vaxa og dafna. Það má því segja að mörg markmið komi heim og saman í því samstarfi nú hefur verið undirritað.

Þorsteinn Örn Guðmundsson framkvæmdastjóri Meet in Reykjavík segir samninginn mikilvægt skref í að efla Reykjavík sem alþjólega ráðstefnuborg. „Við höfum átt ágætt samstarf við háskólanna undanfarin ár en nú viljum við setja aukinn kraft í samstarfið og fara í markvissari leit að verkefnum sem henta áfangastaðnum og háskólasamfélaginu hér á landi.“