Fréttir eftir árum


Fréttir

HR og Staðlaráð Íslands í samstarf

2.3.2021

 

Staðlaráð Íslands og Háskólinn í Reykjavík (HR) hafa undirritað samning um samstarf. Samkvæmt samningum geta nemendur meðal annars lokið starfsnámi hjá Staðlaráði auk þess sem nemendur og kennarar HR geta nú óskað eftir gjaldfrjálsum og tímabundnum lesaðgangi að stöðlum.

Staðlar í vefverslun

Um 53.000 gildir staðlar eru nú aðgengilegir í íslenskri staðlaskrá. Þar er að finna staðla frá alþjóðasamtökunum ISO og IEC, evrópusamtökunum CEN og CENELEC, norræna staðla undir merkjum INSTA og séríslenska og þýdda staðla frá Staðlaráði Íslands. Staðlaskrá er hluti af vefverslun Staðlaráðs og þar má leita að stöðlum eftir númerum, efnisorðum, ICS flokkum og einstökum tækninefndum.

Hægt að skapa sér sérstöðu

Staðlaráð býður nemendum upp á starfsnám sem unnt er að klæðskerasníða að þörfum nemenda. Viðfangsefni staðla eru margvísleg og því unnt að tengja þau námi í öllum greinum. Starfsnám hjá Staðlaráði gefur nemendum forskot á vinnumarkaði þar sem lítið er um staðlatengt nám hérlendis. Staðlaráð á gott aðgengi að sérfræðingum erlendra staðlasamtaka sem einnig gæti nýst gæti í þessu tilliti.

Dæmi um áhugaverða nálgun í starfsnámi:

  • Heimsmarkmið Sameinuðu þjóðanna um sjálfbærni
  • CE-merkingar
  • staðlar og löggjöf
  • staðlar og gervigreind
  • staðlar í byggingariðnaði
  • staðlar sem styðja við ferðaþjónustu
  • staðlar og nýsköpun
  • staðlar við opinber innkaup
  • staðlar sem stuðla að sjálfbærni
  • staðlar og neytendavernd
  • Evrópustaðlar sem hryggjarstykki við að tryggja einsleitan innri markað í Evrópu