Fréttir eftir árum


Fréttir

MH vann Boxið – framkvæmdakeppni framhaldsskólanna 2017

12.11.2017

Lið Menntaskólans við Hamrahlíð vann Boxið – framkvæmdakeppni framhaldsskólanna í ár, eftir æsispennandi keppni. Átta lið frá jafnmörgum framhaldsskólum kepptu til úrslita í dag í Háskólanum í Reykjavík. Lið Menntaskólans Í Reykjavík varð í öðru sæti og lið Fjölbrautarskóla Suðurlands í því þriðja.

Þetta er annað árið í röð sem lið MH ber sigur úr býtum í Boxinu. Vinningsliðið skipuðu: Gunnar Dofri Viðarsson, Árni Haukur Árnason, Birkir Jóhannes Ómarsson, Davíð Sindri Pétursson, Gunnar Dofri Viðarsson og Þorsteinn Jónsson.

Meðal þeirra þrauta sem liðin glímdu við í ár var að hanna og smíða brú úr einu kílói af spaghettíi, forrita díóðulampa fyrir þörungaræktun, smíða bíl úr gosdrykkjadósum og greina gögn úr lygamæli. Þrautirnar eru hannaðar af sérfræðingum fyrirtækja, úr ólíkum greinum iðnaðarins, með aðstoð fræðimanna HR og reyna á verklega og bóklega þekkingu, hugvit, verklag, útsjónasemi og samvinnu þátttakenda. Fyrirtækin sem lögðu þrautir fyrir nemendurna í ár voru: Endurvinnslan, KeyNatura, Valka, Marel, Mannvit, Oddi, NoxMedical og Kóðinn/Skema.

Öll liðin sem tóku þátt í Boxinu stilla sér upp í tröppum í HR27 lið tóku þátt í undankeppni Boxsins sem haldin var nýlega í framhaldsskólum landsins. Skólarnir sem kepptu til úrslita í dag voru: Menntaskólinn við Hamrahlíð, Menntaskólinn í Kópavogi, Menntaskólinn að Laugarvatni, Menntaskólinn í Reykjavík, Tækniskólinn, Fjölbrautarskólinn í Breiðholti, Kvennaskólinn í Reykjavík og Fjölbrautaskóli Suðurlands

Þetta er í sjöunda sinn sem Boxið er haldið. Að keppninni standa Samtök iðnaðarins, Háskólinn í Reykjavík, mennta- og menningarmálaráðuneytið og Samband íslenskra framhaldsskólanema. Markmið með Boxinu er að kynna og vekja áhuga nemenda í framhaldsskólum á verk- og tækninámi og fjölbreyttum störfum í iðnaði.

Nánari upplýsingar um Boxið er að finna á www.ru.is/boxid