Fréttir eftir árum


Fréttir

MPM-nám við HR hlýtur vottun Breska verkefnastjórnunarfélagsins

24.11.2015

Accred_black_exc_zoneMPM-nám í verkefnastjórnun við tækni- og verkfræðideild Háskólans í Reykjavík hlaut nýverið formlega vottun frá Breska verkefnastjórnunarfélaginu, APM.

Í umsögn kemur fram að MPM-námið við HR sé dæmi um bestu aðferðir (e. best practice) á heimsvísu í meistaranámi í verkefnastjórnun. Vottunin er mikil viðurkenning fyrir MPM-námið sem er þar með komið í flokk um 30 námsbrauta við háskóla sem hafa hlotið slíka vottun fyrir nám á sviði verkefnastjórnunar. Tilgangur APM með vottuninni er að leiðbeina nemendum og fagfólki um allan heim með því að benda á bestu námsleiðir sem í boði eru á sviði verkefnastjórnunar.

Vinna við undirbúning vottunar MPM-námsins við HR hófst vorið 2015 og ítarlegri skýrslu um námið var skilað til úttektarnefndar APM í júní síðastliðnum. Liður í úttektinni var heimsókn úttektarmanns APM til Íslands í haust þar sem hann fylgdist með kennslu, ræddi við forsvarsmenn MPM-námsins, núverandi og útskrifaða nemendur, hagsmunaaðila í atvinnulífinu og fleiri. Vottun námsins frá APM er mikilvægur liður í þróun MPM-námsins í takti við þarfir atvinnulífsins og sívaxandi notkun aðferða verkefnastjórnunar hjá fyrirtækjum og stofnunum.

Um 300 manns hafa lokið MPM-námi á Íslandi, sem hefur verið í boði síðan árið 2005. Fólk sem sækir MPM-námið er með fjölbreytta menntun og reynslu að baki og hefur m.a. komið úr hugbúnaðargerð, verkfræði, náttúruvísindum og félagsvísindum. Fólk með MPM-gráðu starfar hjá fjölbreyttri flóru fyrirtækja og stofnana á flestum sviðum þjóðfélagsins.

Breska verkefnastjórnunarfélagið APM var stofnað árið 1972 og er í dag stærsta verkefnastjórnunarfélag í Evrópu með tugþúsundir félagsmanna. APM starfar innan IPMA - Alþjóðasamtaka verkefnastjórnunarfélaga og er stærsta aðildarfélag samtakanna.

Sjá vef MPM-námsins við HR

MPM-nám við HR fær vottun