Fréttir eftir árum


Fréttir

Nemendur stofna jafnréttisfélag

5.10.2015

Nemendur stofna jafnréttisfélagFormaður nýstofnaðs Jafnréttisfélags, Maríanna Ósk Hölludóttir, hélt ræðu við stofnun félagsins.

Jafnréttisfélag Háskólans í Reykjavík var í dag stofnað af Stúdentafélagi Háskólans í Reykjavík. 

Félagið er stofnað í upphafi Jafnréttisdaga sem haldnir eru í vikunni í háskólum landsins. 

Mikið verk óunnið

Markmið Jafnréttisfélags Háskólans í Reykjavík er að auka umræðu um jafnréttismál í víðum skilningi, jafnt innan veggja háskólans, sem utan. Meðal þeirra málefna sem félagið telur mikilvægt að auka umræðu um eru málefni kvenna, fólks af erlendum uppruna, hælisleitenda, samkynhneigðra, transfólks, fatlaðra og allra annarra sem verða fyrir fordómum eða mismunun í samfélaginu. 

Félagið telur að mikið verk sé enn óunnið þegar kemur að því að auka skilning á málefnum minnihlutahópa og ætla meðlimir félagsins að leggja sig fram við að koma á jákvæðum breytingum og umræðu um jafnréttismál og vinna gegn hvers kyns fordómum og fáfræði.

Stjórn Jafnréttisfélags Háskólans í Reykjavík skipa Maríanna Ósk Hölludóttir, formaður, nemi í frumgreinadeild, Helgi Bergmann, nemi í lögfræði, Sandra Heimisdóttir, nemi í lögfræði, Carmen González de Peláez, meistaranemi í viðskiptafræði og Kristinn Þorri Þrastarson, nemi í tölvunarfræði.

Fjölbreytt dagskrá á Jafnréttisdögum

Í tilefni Jafnréttisdaga býður félagið upp á fjölbreytta dagskrá í Háskólanum í Reykjavík, sem hófst með ljósgjörningi og tónleikum í hádeginu í dag. Í vikunni verður jafnframt boðið upp stutta hádegisfyrirlestra um jafnréttismál. 

Dagskrá jafnréttisdaga í HR

Sjá myndir frá dagskrá í Sólinni á Facebook-síðu HR