Fréttir eftir árum


Fréttir

Ný námsbraut í hagfræði frá og með næsta hausti

22.2.2016

Nemendur við Háskólann í ReykjavíkFrá og með næsta hausti mun Háskólinn í Reykjavík hefja kennslu á nýrri námsbraut í hagfræði. Námið er viðbót við námsframboð í viðskiptafræði og sálfræði við viðskiptadeild HR. Ný námsbraut samræmist stefnu háskólans um að styrkja samkeppnishæfni og lífsgæði á Íslandi og skapa nemendum tækifæri.

„Það er þörf á aukinni þekkingu á sviði hagfræði í atvinnulífinu,“ segir Þóranna Jónsdóttir, forseti viðskiptadeildar HR. „Deildin hefur á að skipa mjög færum sérfræðingum á sviði hagfræði sem hafa áratuga reynslu af kennslu, rannsóknum og störfum fyrir atvinnulíf og samfélag. Stofnun nýrrar námsbrautar í hagfræði hefur verið í undirbúningi í tvö ár og er eðlilegt framhald af uppbyggingu kennslu í viðskiptatengdum greinum við háskólann.“

868481Þóranna Jónsdóttir, forseti viðskiptadeildar

Þegar hefur verið opnað fyrir umsóknir í námið. Meðal kennara verða dr. Friðrik Már Baldursson, prófessor; dr. Katrín Ólafsdóttir, lektor, dr. Axel Hall, lektor og fleiri sérfræðingar frá Háskólanum í Reykjavík og íslensku atvinnulífi. Tvær námsleiðir verða í boði: BSc-gráða í hagfræði og fjármálum og BSc-gráða í hagfræði og stjórnun.

Viðskiptafræði hefur verið kennd við Háskólann í Reykjavík í áraraðir. Tvær námsbrautir við deildina hafa hlotið alþjóðlega vottun um gæði náms. Í náminu verður lögð áhersla á að nemendur öðlist sterkan fræðilegan grunn í hagfræði, samhliða því að þeir fái haldgóða og hagnýta færni í að beita sinni þekkingu. Til að undirbúa nemendur sem best fyrir framhaldsnám og störf í alþjóðlegu umhverfi er talsverður hluti námsins á ensku. Nám í hagfræði við viðskiptadeild HR er þriggja ára, 180 ECTS-nám.

Hagfræði BSc við viðskiptadeild HR