Fréttir eftir árum


Fréttir

Ný stjórn HR semur við rektor til fjögurra ára

19.9.2022

Fjórar konur og tveir karlar uppstillt og horfa í myndavélina, standandi í fyrir framan líkan af byggingu Háskólans í Reykjavík. Í bakgrunni er merki Háskólans í Reykjavík

Ný stjórn HR; Sigurður Hannesson, Tanya Zharov, Svanhildur Hólm, Halldór Benjamín Þorbergsson og Guðbjörg Edda Eggertsdóttir ásamt rektor HR, Ragnhildi Helgadóttur.

Ný stjórn Háskólans í Reykjavík hefur framlengt ráðningarsamning dr. Ragnhildar Helgadóttur rektors til ársins 2026. Hún tók við stöðunni af dr. Ara Kristni Jónssyni árið 2021, en hann hafði verið rektor í ellefu ár. Ragnhildur gerði upphaflega samning til eins árs, sem hefur nú verið framlengdur.

Dr. Ragnhildur segir undanfarið ár hafa verið skemmtilegt og krefjandi. 

Háskólinn í Reykjavík stendur faglega sterkar en nokkru sinni og það gengur allt afskaplega vel. Skólinn hefur á að skipa frábæru starfsfólki og nemendahópurinn hefur aldrei verið stærri eða sterkari, en 300 starfsmenn og 350 stundakennarar vinna nú með ríflega fjögur þúsund nemendum skólans. Yfirlýst hlutverk HR er að undirbúa samfélagið fyrir framtíðina og það gerum við með því að skapa og miðla þekkingu. Skólinn stendur mjög vel á alþjóðlegum listum yfir gæði háskóla. Í mínum verkahring er sem fyrr að hugsa um hag skólans í heild. Það gerum við til dæmis með því að efla mannauð okkar í námi, rannsóknum og starfi. Þegar vel tekst til nærum við vaxtarsprota sem leiða til nýsköpunar í atvinnulífi. Við vitum um sextíu sprotafyrirtæki með rætur í verkefnum í HR. Það þykir mér harla gott fyrir ungan skóla af hóflegri stærð.


Í fyrsta sinn er samið við rektor um að gegna starfinu í tiltekinn tíma – fjögur ár – en möguleiki er á að sami einstaklingur gegni starfinu í tvö tímabil. Þetta er í samræmi við það sem gerist í öðrum háskólum á Norðurlöndunum.

Ragnhildur hefur um tveggja áratuga skeið verið meðal virkustu vísindamanna Háskólans í Reykjavík, en hún hefur jafnframt viðamikla reynslu af stjórnun. Hún var forseti samfélagssviðs HR 2019-2021, deildarforseti lagadeildar 2014-2019 og prófessor við lagadeild frá 2006. Kennslu við skólann hóf hún árið 2002. Ragnhildur var í sex ár formaður vísindanefndar Vísinda- og tækniráðs og hefur gegnt ýmsum öðrum trúnaðarstörfum. Hún hefur kennt við háskóla í Montreal, Ottawa, París og Toulouse.

NÝ STJÓRN HÁSKÓLANS Í REYKJAVÍK
Nýja stjórn HR skipa Guðbjörg Edda Eggertsdóttir (formaður), Halldór Benjamín Þorbergsson, framkvæmdastjóri Samtaka atvinnulífsins, Sigurður Hannesson, framkvæmdastjóri Samtaka iðnaðarins, Svanhildur Hólm Valsdóttir framkvæmdastjóri Viðskiptaráðs og Tanya Zharov, aðstoðarforstjóri Alvotech.

Háskólinn í Reykjavík er hlutafélag og eru hluthafar og eignarhluti þeirra eftirfarandi: Menntasjóður Viðskiptaráðs Íslands 64%, Samtök iðnaðarins 24% og Samtök atvinnulífsins 12%. Eigendur hafa ekki fjárhagslegan ávinning af rekstri HR og það er óheimilt að greiða arð til hluthafa. HR er því rekinn eins og um sjálfseignarstofnun sé að ræða og ávinningurinn snýst um að efla menntun í landinu. Stjórnin sinnir almennum stjórnarstörfum og ber ábyrgð á stefnumótun, stjórnskipulagi, fjármálum og almennum rekstri.

///

Reykjavik University‘s Board of Directors has extended the contract of dr. Ragnhildur Helgadóttir, RU‘s President until 2026. Ragnhildur took over from dr. Ari Kristinn Jónsson in 2021, but he had been President for eleven years. Ragnhildur initially signed a contract for one year, which has now been extended.

The new RU‘s Board of Directors are:

  • Guðbjörg Edda Eggertsdóttir, Chairman of the RU Board of Directors
  • Halldór Benjamín Þorbergsson, Managing Director, SA - Confederation of Icelandic Enterprise
  • Tanya Zharov, Deputy Chief Executive Officer, Alvotech
  • Svanhildur Hólm, Managing Director, Icelandic Chamber of Commerce
  • Sigurður Hannesson, Director General, SI - The Federation of Icelandic Industries