Fréttir eftir árum


Fréttir

Nýútskrifaðir lögfræðingar frá HR eftirsóttur starfskraftur

29.6.2015

Um 85% þeirra sem útskrifuðust sem lögfræðingar á Íslandi árið 2014 hafa fengið starf og meðallaun nýútskrifaðra lögfræðinga eru á milli 500 og 600 þúsund á mánuði. 64% þeirra sem útskrifuðust frá Háskólanum í Reykjavík árið 2014 starfa við lögfræðistörf og meðallaun nýútskrifaðra lögfræðinga frá HR eru yfir meðallaunum nýútskrifaðra lögfræðinga á Íslandi. Þetta kemur fram í niðurstöðum könnunar Lögfræðingafélag Íslands meðal þeirra sem luku meistaragráðu í lögfræði á Íslandi, og birt var á vef félagsins í síðustu viku.

Þessar niðurstöður ríma vel við niðurstöður könnunar sem gerð var af Maskínu á meðal útskriftarnema við HR í vor. Þar kom m.a. fram að 76% meistaranema sem brautskráðust úr lagadeild HR í vor, og stefndu á vinnumarkað, voru komnir með vinnu fyrir brautskráninguna. Þar af starfa um 80% að fullu leiti eða hluta við lögfræðistörf. Yfir 90% sögðust myndu mæla með námi við HR og gáfu því einkunnina 4,6 af 5 mögulegum varðandi hversu vel það hefði búið þá fyrir atvinnulífið. Ennfremur fékk námið níu af tíu í einkunn þegar spurt var um líkur á að þeir mæla með náminu.

Háskólinn í Reykjavík leggur áherslu á að veita fjölbreytta menntun sem nýtist á vinnumarkaði. Þessar niðurstöður staðfesta að það er mikil og stöðug eftirspurn eftir lögfræðimenntuðu fólki frá HR í fjölbreytt störf hjá íslenskum fyrirtækjum og stofnunum.