Fréttir eftir árum


Fréttir

Ríflega 1,3 milljón raddsýna söfnuðust

Úrslit Lestrarkeppni grunnskólanna árið 2022 liggja fyrir

28.1.2022

Þetta er þriðja árið sem Háskólinn í Reykjavík og Almannrómur standa fyrir Lestrarkeppni grunnskóla. Keppnin gengur út á að lesa setningar inn í gagnasafn í gegnum vefinn samrómur.is. Upptökurnar verða svo notaðar til að þróa máltæknilausnir sem kenna tölvum og tækjum að skilja íslensku.

Það var Salaskóli sem sigraði í flokki A, flokki stærri skóla, og lásu 703 keppendur 107.075 setningar. Smáraskóli bar sigur úr í býtum í flokki B, sem inniheldur skóla af miðstærð, og las jafnframt mest allra í keppninni eða 236.470 setningar en 914 einstaklingar tóku þátt fyrir hönd skólans. Hörð keppni var í flokki C, flokki smærri skóla, en þar sigraði Höfðaskóli með 153.288 setningar lesnar af 353 keppendum. 

Eliza Reid, forsetafrú, ásamt Berki Vígþórssyni, skólastjóra Smárskóla ásamt Emilíu Guðný Magnúsdóttur og Lúkas-Matei Danko, þegar keppnin hófst í Smáraskóla.Eliza Reid, forsetafrú, ásamt Berki Vígþórssyni, skólastjóra Smárskóla ásamt Emilíu Guðný Magnúsdóttur og Lúkas-Matei Danko, þegar keppnin hófst í Smáraskóla.

Jafnframt eru veitt þrenn aukaverðlaun fyrir framúrskarandi árangur með tilliti til fjölda setninga sem hver skóli las, þvert á flokka. Sandgerðisskóli náði framúrskarandi árangri en þar lásu 593 einstaklingar 208.535 setningar. Öxarfjarðarskóli og Gerðaskóli fá einnig verðlaun fyrir framúrskarandi árangur. Í Öxarfjarðarskóla lásu 285 keppendur 147.189 setningar og fyrir Gerðaskóla tóku 406 einstaklingar þátt og lásu 89.336 setningar.

Gríðarleg spenna myndaðist á lokasprettinum og var síðasti dagur keppninnar sá langstærsti til þessa, en þá lásu keppendur inn 487.936 setningar. Alls tóku 118 skólar þátt og lögðu 5.652 manns sínum skóla lið í þessari keppni.

Háskólinn í Reykjavík og Almannarómur þakka öllum sem tóku þátt í keppninni og lögðu sitt að mörkum. Vefurinn samrómur.is verður opinn áfram og hvetjum við öll til að halda áfram lestri inn í gagnagrunninn og leggja þannig sitt af mörkum fyrir framtíð íslenskunnar.