Fréttir eftir árum


Fréttir

Sleipnir á Silverstone – lið HR í Formula Student í fyrsta skipti

15.7.2016

Lið Háskólans í Reykjavík, Team Sleipnir, er nú mætt á Silverstone í Englandi til að taka þátt í Formula Student keppninni. Þetta er í fyrsta sinn sem lið frá HR tekur þátt í keppninni, en 14 strákar og stelpur úr verkfræði og tæknifræði eru mætt á svæðið með kappakstursbíl. 

Bíllinn gengur fyrir lífeldsneyti og mun keppa í flokki E85, bíla sem nota eldsneyti sem er 15% bensín og 85% etanól (alkóhól). Bíllinn er að öllu leyti hannaður og að langstærstum hluta smíðaður af nemendum með tækjabúnaði skólans. Undirbúningur hófst vorið 2015 en stærsti hluti hönnunar og smíði fór fram á vorönn 2016. Vélin í bílnum er fengin úr Polaris Outlaw fjórhjóli en hefur verið breytt með því að setja í hana forþjöppu og beina innspýtingu. Vélartölvan var hönnuð og forrituð frá grunni af nemendum og er byggð á ódýrri Arduino stýritölvu, en hjá flestum Formula Student liðum er vélatölvan dýrasti einstaki hlutur bílsins. Markmið hópsins fyrir keppnina var að hanna og smíða einfaldan, ódýran og öruggan bíl sem kæmist í gegnum öryggisskoðun og gæti tekið þátt í aksturshluta keppninnar. Það er metnaðarfullt markmið í fyrsta sinn sem liðið tekur þátt, en fæst lið ná að fara með aksturshæfan bíl í fyrsta sinn. Næstu ár verður byggt á reynslunni og sá bíll sem er fyrir hendi nýttur sem grunnur fyrir áframhaldandi þróun.