Fréttir eftir árum


Fréttir

Tölvunarfræðinemar við HR og Travelade þróa gervigreind fyrir ferðamannageirann

14.5.2018

Tölvunarfræðideild Háskólans í Reykjavík og sprotafyrirtækið Travelade hafa skrifað undir samstarfssamning sem meðal annars felur í sér að nemendur í tölvunarfræði við HR muni vinna meistaraverkefni í samvinnu við fyrirtækið.

Fyrsta verkefnið er að þróa nýja lausn sem nýtist ferðamönnum hér á landi við að finna afþreyingu í samræmi við áhuga hvers og eins. Með gervigreindartækni verður útbúið nýtt meðmælakerfi sem byggist á gögnum um hegðun notenda á vef Travelade. Verkefnið er stutt af Tækniþróunarsjóði Rannís.

Gísli Hjálmtýsson, deildarforseti tölvunarfræðideildar HR: „Við leggjum mikla áherslu á að nemendur okkar hafi kost á að vinna að fjölbreyttum verkefnum með fyrirtækjum. Þessi samningur gerir okkur kleift að bæta í þá flóru og bjóða meistaranemum að taka þátt í mjög spennandi þróunarstarfi hjá vaxandi íslensku sprotafyrirtæki. Við erum mjög ánægð með það.“

Tveir menn standa hlið við hlið í Sólinni í HRAndri Heiðar og Gísli.

Andri Heiðar Kristinsson, stofnandi og framkvæmdastjóri Travelade: „Í dag eru meðmælakerfi í ferðageiranum öll fremur almenn, það er, þau byggjast að öllu leyti á einfaldri stjörnugjöf en raunveruleikinn er mun margslungnari en það. Það væri t.d. miklu gagnlegra fyrir mig að sjá stjörnugjöf frá fólki sem hefur svipaðan ferðastíl og ég, er á svipuðum aldri og hefur sambærileg áhugamál. Með samstarfinu við HR vonumst við til að taka skref í þá átt að sérsníða meðmælakerfi fyrir ferðamenn sem gæti gjörbreytt því hversu auðvelt er fyrir ferðamenn að finna afþreyingu við sitt hæfi.“

Travelade er upplýsinga- og bókunarvefur fyrir ferðamenn sem hefur vaxið ört frá því að hann fór í loftið síðastliðið sumar. Þjónustan er nú aðgengileg fyrir ferðamenn á leið til Íslands, Finnlands og Bosníu en fleiri lönd munu bætast við í sumar. Markhópur vefsins er hin svokallaða „AirBnB kynslóð“, þ.e. fólk sem skipuleggur ferðir sínar sjálft á netinu og notast ekki við ferðaskrifstofur eða kaupir tilbúnar pakkaferðir. Andri Heiðar Kristinsson, fyrrum þróunarstjóri hjá LinkedIn í San Francisco, og Hlöðver Þór Árnason, fyrrum tæknistjóri hjá Já, stofnuðu Travelade í ársbyrjun 2017 og í desember síðastliðnum lauk félagið 160 milljóna króna fjármögnun sem leidd var af Crowberry Capital.

Tölvunarfræðideild Háskólans í Reykjavík er stærsta tölvunarfræðideild landsins og hefur getið séð gott orð í vísindasamfélaginu á heimsvísu fyrir öflugar rannsóknir. Helstu rannsóknarsvið deildarinnar eru gervigreind, fræðileg tölvunarfræði og hugbúnaðar- og tölvukerfi. Nám í tölvunarfræði við HR hefur hlotið alþjóðlega vottun og hefur sérstöðu vegna sterkra tengsla við atvinnulífið og áherslu á raunhæf verkefni. Tölvunarfræðideildir HR og HÍ hlutu sameiginlega upplýsingatækniverðlaun SKÝ árið 2018.