Fréttir eftir árum


Fréttir

HR hlýtur styrk til uppbyggingar náms í efnisfræði og málmfræði

8.4.2016

 

Rektor tekur við styrknum

Magnús Þór Ásmundsson og Ari Kristinn Jónsson

Á málstofu sem haldin var í HR í gær, fimmtudag, afhenti Magnús Þór Ásmundsson, forstjóri Alcoa Fjarðaáls Háskólanum í Reykjavík styrk til áframhaldandi eflingar rannsókna og kennslu í efnisverkfræði og málmfræði á háskólastigi. Umfjöllunarefni málstofunnar var efnisverkfræði í sjálfbærri álframleiðslu. Hún var önnur í röð fjögurra málstofa í HR sem fjalla um lífstoðefni, ál, efni sem notuð eru við orkuskipti og áskoranir á sviði jarðhita.

Vilja efla háskólamenntun hér á landi

Magnús Þór sagði Samfélagssjóð Alcoa veita fé til verkefna sem tengjast umhverfi, menntun og fræðslu og samfélagsþátttöku starfsfólks. Það væri hlutverk Fjarðaáls að benda á tækifærin sem eru til staðar á Íslandi til að hafa jákvæð áhrif á samfélagið. „Hjá okkur starfa um 90 háskólamenntaðir starfsmenn auk þess sem við kaupum verkfræðiþjónustu og aðstoð verktaka með mikla tækniþekkingu. Nemendur hafa þurft að sækja sér framhaldsmenntun á þessu sviði erlendis. Að stunda nám erlendis er í sjálfu sér jákvætt en það væri jafnframt jákvætt að hafa framhaldsnám á þessu sviði við íslenskan háskóla.“ Magnús sagði að iðnaðurinn væri aðlaðandi fyrir nýútskrifaða verkfræðinga og því þyrfti að halda á loft. „HR hefur sýnt mikið frumkvæði í þessu máli. Því veitum við háskólanum styrk til að efla rannsóknir og kennslu í efnisfræði.“ Styrkurinn nemur 100 þúsund dollurum.  

Hlutverk HR að efla samkeppnishæfni

Það var Ari Kristinn Jónsson, rektor, sem veitti styrknum viðtöku. Hann sagði ál- og málmiðnað vera eina af grunnstoðum efnahagslífsins. „Við höfum rætt það hér meðal okkar innanhúss og með fyrirtækjum að efling menntunar og rannsókna á þessu sviði sé verkefni sem skiptir máli. HR er stærsti tækniháskóli landsins, og er líka háskóli atvinnulífsins. Það er því okkar hlutverk að efla samkeppnishæfni íslenskra fyrirtækja með nýsköpun, samstarfi og rannsóknum. Við þökkum kærlega fyrir þennan stuðning í verki og fyrir þá framsýni að fjárfesta í uppbyggingu menntunar á háskólastigi og hlökkum til samstarfsins á næstu árum.“

Kemur við sögu í flestum tækninýjungum

Verið er að auka veg efnisverkfræði sem fræðasviðs við Háskólann í Reykjavík. Þetta svið verkfræðinnar er tengt  málmfræði og þéttefnisfræði og hefur áhrif á flestar tækninýjungar. Ísland er að mörgu leyti ákjósanlegur staður til kennslu og rannsókna í efnisverkfræði enda eru framleidd meira en 800.000 tonn af áli á hverju ári og kísilframleiðsla eykst hratt. Þrátt fyrir að þessi iðnaður sé afar mikilvægur atvinnulífinu, hefur lítið verið um rannsóknir á þessu sviði á Íslandi.