Project Management: Mindhunter's research project

Fyrirlestur „Dr. Carr“ úr Mindhunter

  • 18.4.2018, 17:00 - 19:00

Þættirnir Mindhunter (2017) á Netflix fjalla um rannsóknir Atferlisvísindadeildar FBI (Behavioral Science Unit) á hugarheimi raðmorðingja. Persónur þáttanna byggja á raunverulegum persónum og nú hefur MPM-námið við Háskólann í Reykjavík boðið dr. Ann Burgess (dr. Carr í þáttunum) og manni hennar, dr. Allen G. Burgess, til Íslands til að segja frá þessu áhugaverða rannsóknarverkefni. Fyrirlesturinn verður haldinn 18. apríl kl. 17-19 í stofu M101 í HR. Hann er haldinn í samstarfi við Læknafélag Íslands, Sálfræðingafélag Íslands, Landssamband lögreglumanna, Mennta- og starfsþróunarsvið lögreglunnar, heilbrigðisvísindasvið HA, Verkefnastjórnunarfélagið og Rannsóknastofu í afbrotafræði við HÍ.

Hægt verður að fylgjast með streymi frá fyrirlestrinum á slóðinni: https://livestream.com/ru/mindhunter

Ann Burgess var frumkvöðull í að leggja áherslu á vettvangsgreiningar og viðtöl við gerendur. Í rannsókninni, sem var styrkt var af National Institute of Justice, var bæði eigindlegum og megindlegum aðferðum beitt til afla gagna og greina þau.

Í fyrirlestrinum verður fjallað um verkefnið út frá sjónarmiðum verkefnastjórnunar, fjallað um hlutverk Atferlisvísindadeildar FBI í bandarísku réttarkerfi og þátt Ann í rannsókninni. Eins mun Ann lýsa persónulegri reynslu sinni af því að starfa með lögreglufulltrúunum John E. Douglas og Robert K. Ressler úr Mindhunter þáttunum. 

Ann Burgess starfar nú sem prófessor í geðhjúkrunarfræðum við Boston College School of Nursing og er heimsþekkt fyrir rannsóknir sínar bæði á gerendum, og ekki síður þolendum, ofbeldisverka. 

Fyrirlesturinn er öllum opinn á meðan húsrúm leyfir.