Stelpur og tækni

  • 3.5.2018

Viðburðurinn Stelpur og tækni er nú haldinn í fimmta skipti. Viðburðurinn hefur farið stækkandi ár frá ári og verður nú fjölmennari en nokkru sinni fyrr. Gert er ráð fyrir að um helmingur stelpna í 9. bekkjum grunnskóla landsins taki þátt í Reykjavík og á Akureyri eða samtals um 900 stelpur úr hátt í 50 grunnskólum.

Dagurinn er haldinn af Háskólanum í Reykjavík í samvinnu við Samtök iðnaðarins, SKÝ og LS Retail.  Tilgangurinn er að kynna möguleika í tækninámi  og störfum fyrir stelpum í 9. bekk grunnskóla, kynna þær fyrir fyrirmyndum í tækni og opna augu þeirra fyrir þeim framtíðarmöguleikum sem tæknigreinar bjóða. 

Stelpur og tækni verður haldinn 3. maí í Háskólanum í Reykjavík. 15. maí verður viðburðurinn svo haldinn á Akureyri í samstarfi við Háskólann á Akureyri. Á fimmtudaginn, 3. maí, mæta um 750 stelpur úr grunnskólum á höfuðborgarsvæðinu í HR. Þar er boðið upp á vinnusmiðjur í umsjá /sys/tra, félags kvenna í tölvunarfræði við HR og kennara tölvunarfræðideildar og tækni- og verkfræðideildar. Viðfangsefnin eru af ólíkum toga, til dæmis kynnast þær forritun og gerð vefsíðu með tungumálum vefhönnunar, uppbyggingu tölvuleikja, þrívíddarprentun líffæra og brotaþoli beina. 

Eftir að vinnustofunum lýkur heimsækja stelpurnar fjölbreytt tæknifyrirtæki þar sem konur sem starfa hjá fyrirtækjunum gefa stelpunum innsýn í starfsemina og þau tækifæri sem stelpum bjóðast á vinnumarkaði að loknu tækninámi. Þau fyrirtæki sem taka þátt í ár eru: LS Retail, Marel, Eimskip, Landsnet, Landsvirkjun, Arion banki, Opin Kerfi, Meniga, Valitor, Orkuveita Reykjavíkur, Össur, Íslandsbanki, Landsbankinn, RB, Syndis, Tækniskólinn, Myrkur, Advania, Kolibri, Síminn, Wise, Sensa, Microsoft,  Nova, Efla, Origo, Tempo og Vodafone Samorka.

Dagurinn er haldinn að fyrirmynd Girls in ICT Day sem haldinn er víða um heim af ITU (International Telecommunication Union), samtökum um upplýsinga- og samskiptatækni innan Sameinuðu þjóðanna.

Viðburðurinn á Facebook

Lesa meira um Stelpur og tækni