Stelpur og tækni 2020
Dagurinn verður haldinn í sjöunda sinn á Íslandi þann 20. maí.
Stelpur og tækni dagurinn (Girls in ICT Day) verður haldinn í sjöunda sinn á Íslandi þann 20. maí næstkomandi. Dagurinn er haldinn víða um heim af ITU (International Telecommunication Union), samtökum um upplýsinga- og samskiptatækni innan Sameinuðu þjóðanna.
Í ár þurfum við að aðlaga okkur að breyttum aðstæðum í samfélaginu og ætlum við því að hafa daginn „online“ í þetta sinn. Það jákvæða við það er að nú getum við boðið öllu landinu að vera með.
Hugmyndin með deginum er að kynna ýmsa möguleika í tækninámi sérstaklega fyrir stelpum í 9. bekk grunnskóla og opna þannig augu þeirra fyrir þeim framtíðarmöguleikum sem tæknigreinar bjóða.
Við byrjum á sameiginlegri dagskrá sem verður streymt til allra þátttökuskólanna, að henni lokinni verður boðið upp á tvær vinnustofur. Fyrri vinnustofan verður einföld vefsíðuforritun í Wordpress og sú seinni tónlistarforritun í Sonic pi.
Gert er ráð fyrir að dagskráin vari frá kl 9:30 til 12:30 ca.
Til að skrá skóla í Stelpur & tækni 2020 er nóg að senda tölvupóst á vidburdir@ru.is fyrir 11. maí nk.
