Tímarit Háskólans í Reykjavík inniheldur fjölbreyttar greinar og viðtöl um rannsóknir og önnur viðfangefni nemenda og kennara við HR, í lífi og starfi. Það kom út í tíunda sinn í nóvember 2018. Hægt er að lesa tímaritið í heild sinni sem flettirit.
Það vita það ef til vill ekki margir, en Íslendingar eiga margverðlaunaðan keppanda á alþjóðavettvangi í bardagaíþróttinni taekwondo.
Meisam Rafiei, sem fæddist í Suður-Íran en hefur verið búsettur á Íslandi síðan árið 2010, hefur á keppnisferli sínum unnið til fjölda verðlauna fyrir Ísland í greininni. Meisam er nemandi við tækni- og verkfræðideild Háskólans í Reykjavík og hefur jafnframt keppt fyrir hönd háskólans á mótum í Evrópu.
Taekwondo á uppruna sinn að rekja til Kóreu. „Þetta er bardagaíþrótt sem kennir sjálfsaga og virðingu,“ útskýrir Meisam. „Henni er skipt í poomsae og sparring eða form og bardaga. Í bardaga, sem ég sérhæfi mig í, keppa tveir aðilar á móti hvor öðrum og reyna að ná stigum með spörkum og keppendur nota rafbrynjur og hjálma.“ Meisam kynntist íþróttinni á barnsaldri, en hann er einn níu systkina. „Eldri bróðir minn var alltaf að æfa og dró mig með á æfingar. Ég fann strax að þetta átti vel við mig.“ Hálf fjölskyldan býr enn í Íran, þar á meðal foreldrar hans, en önnur systkini búa í Lundúnum og Þýskalandi. „Það er mjög öðruvísi umhverfi hér á Íslandi og veður en í Íran. Mér finnst alveg fínt að hafa kulda og snjó en það væri betra ef það væri bara í einn mánuð á ári!“
Árangur Meisam í taekwondo hefur verið með ólíkindum. „Ég er búinn að keppa mikið og víða, áður fyrr keppti ég fyrir Íran en núna keppi ég fyrir Ísland.“ Meisam hefur þar að auki keppt fyrir Háskólann í Reykjavík á alþjóðlegum háskólaleikum. Fyrir HR hlaut hann gullverðlaun í European Universities Championships háskólakeppninni í Króatíu árið 2015 og í ár hlaut hann silfurverðlaunin á European Universities Games, þar sem 500 nemendur frá 300 skólum tóku þátt. Meisam var nálægt því að komast á Ólympíuleikana í Ríó en í sínum þyngdarflokki, mínus 58 kílógramma flokki, komast einungis tveir keppendur frá Evrópu þannig að samkeppnin reyndist of hörð.
Meisam hefur starfað við þjálfun í taekwondo síðan hann steig fæti niður hér á landi, enda ekki furða að landsmenn vilji njóta góðs af þeirri miklu kunnáttu og reynslu sem hann býr yfir. Hann hefur nú þriðja árið í grunnnámi í íþróttafræði við tækni- og verkfræðideild HR. „Mig langaði að stunda háskólanám í íþróttafræði og mér fannst brautin hér við HR spennandi.“ Á þriðja ári geta nemendur valið sérhæfingu á íþróttaþjálfunarbraut, íþróttakennarabraut eða lýðheilsubraut. „Ég hef valið að fara á kennarabraut en ég held að það muni nýtast mér best. Það gefur mér mikið að þjálfa, kynnast nýju fólki og hjálpa því að ná markmiðum sínum.“ Meisam er kominn til að vera hér á landi enda búinn að skjóta niður rótum og kominn með fjölskyldu. „Kennslan verður örugglega í fyrsta sæti bráðlega, við sjáum til að með áframhaldið á keppnisferlinum, það verður bara að koma í ljós.“
2002 Gullverðlaun á World Junior Championships í Grikklandi
