Útskriftarathöfn MPM-nema

19.júní 2021

Útskrift Háskólans í Reykjavík fór fram á laugardaginn 19.júní með glæsibrag og luku MPM-2021 nemendur þar með við meistaragráðu sína.

Brautskráning fór fram í Eldborg í Hörpu og að því loknu bauð MPM-námið til MPM-samkomu á Norðurbryggju.

Þar ríkti mikil gleði og fögnuðu nemendur saman árangrinum. Haukur Ingi Jónasson, formaður stjórnar námsins og Helgi Þór Ingason, forstöðumaður náms, héldu tölu og veittu verðlaun. 

Hin árlegu Tryggvaverðlaun byggja á vali útskriftarnemenda á einum samnemanda sem þau treysta helst fyrir flóknu verkefni. Þetta árið voru úrslitin mjög sérstök þar sem tveir nemendur hlutu sama atkvæðafjölda og varð því úr að tvö verðlaun voru veitt! Það voru þeir Hákon Róbert Jónsson og Erlingur Fannar Jónsson sem hlutu verðlaunin sem eru nefnd eftir Tryggva Sigurbjörnssyni verkfræðingi og eins af stofnendum Verkefnastjórnunarfélags Íslands. Tryggvi var innan handar er MPM-námið var sett á fót haustið 2005.

Þessu að auki voru veitt verðlaun fyrir besta lokaverkefnin sem valið var af dómnefnd úr teymi MPM-náms. Verkefnin voru sannarlega hvert öðru betra en úr varð að Eva Kristín Dal hlaut verðlaun þessa árs fyrir verkefnið Áhrif safnastefnu : rannsókn á því hvernig safnastefna á sviði menningarminja hefur nýst íslenskum söfnum. Verkefnið þótti virkilega heildstætt og varpaði fram áhugaverðum og nýjum vinklum í fræðum verkefnastjórnunar.

Það hafa sannarlega verið forréttindi að fylgja MPM-2021 útskriftarárganginum úr höfn og er þetta einstakur hópur sem mun klárlega láta gott af sér leiða í samfélaginu.

Hamingjuóskir til ykkar allra frá MPM-náminu!

Við hlökkum til að sjá ykkur öll á komandi MPM-Alumni samkomum!

HRutskrift_jun21-188