Reglur um skil á lokaverkefnum

Samþykkt í framkvæmdastjórn HR 12. júní 2015

1. Eintökum af lokaverkefnum í grunn-, meistara- og doktorsnámi í öllum deildum skólans skal skila á rafrænu formi í varðveislusafnið Skemmuna (www.skemman.is). Að auki skal skila 2-4 prentuðum eintökum, í samræmi við reglur viðkomandi deildar. Heimilt er að skila eingöngu rafrænu eintaki lokaverkefna í grunnnámi í Skemmuna, sé farið fram á slíkt í reglum viðkomandi deildar um skil lokaverkefna. Eintökum á prenti skal skila í aðalmóttöku HR eða á skrifstofu viðkomandi deildar fyrir kl. 16 á tilgreindri skiladagsetningu [1]. Um frágang lokaverkefna vísast til reglna viðkomandi deildar.

Með prentuðum eintökum sem skilað er inn skal fylgja:

a. Staðfesting á rafrænum skilum í Skemmuna, sem nemandi fær senda í tölvupósti frá Skemmunni að loknum skilum.

b. Yfirlýsing um meðferð lokaverkefna sem varðveitt eru á bókasafni Háskólans í Reykjavík.
Yfirlýsingin skal vera á sérstöku eyðublaði. Sækja eyðublað.

c. Staðfesting um upphleðslu í ritstuldarvörnina Turnitin, sé farið fram á notkun Turnitin í reglum viðkomandi deildar um skil lokaverkefna. Nemandi fær staðfestinguna senda í tölvupósti að upphleðslu lokinni, eða getur prentað hana sjálfur út úr kerfinu (sjá leiðbeiningar í reglum deilda um skil lokaverkefna).

Ef lokaverkefni er einungis skilað á rafrænu formi í Skemmuna skal skila fylgigögnum a-c (sjá hér að ofan) í aðalmóttöku HR eða á skrifstofu viðkomandi deildar fyrir kl. 16 á tilgreindri skiladagsetningu [1].

2. Lokaverkefni skulu varðveitt á bókasafni HR á prentuðu formi og/eða á rafrænu formi í Skemmunni. Opinn aðgangur að lokaverkefni á bókasafni HR er opinber birting í skilningi höfundalaga nr. 73/1972. Lokaverkefni skulu vera opin til aflestrar á bókasafni og/eða í Skemmunni í samræmi við stefnu Háskólans í Reykjavík um opinn aðgang sem samþykkt var þann 13. nóvember 2014. Nemandi hefur þó rétt til að óska eftir að loka aðgangi að lokaverkefni ef það inniheldur upplýsingar sem rétt og eðlilegt er að trúnaður ríki um.

Þá er annars vegar átt við trúnaðarupplýsingar, þ.e. viðkvæmar upplýsingar sem höfundi kann auk þess að vera óheimilt að birta (persónuupplýsingar, viðskiptaupplýsingar þ.m.t. upplýsingar sem samstarfsfyrirtæki óska eftir að leynt fari). Hins vegar verðmætar upplýsingar, s.s. ef lokaverkefni inniheldur viðskiptahugmynd, upplýsingar um og/eða lýsingar á vöru, hugmynd eða aðferð sem hægt er að nýta eða sækja um einkaleyfi á.

Ef höfundur hyggst bjóða lokaverkefni sitt til kaups er heimilt að loka því í sex mánuði.

 [1] Hér er átt við skiladag fyrir endanlegt lokaeintak eftir atvikum með leiðréttingum gerðum eftir vörn verkefnisins.


Var efnið hjálplegt? Nei