Stúdentafélagið í HR stóð fyrir árlegum Ólympíuleikum SFHR í vikunni. Þar koma nemendur úr öllum deildum innan skólans saman og keppa í nokkuð nýstárlegum og skemmtilegum greinum allt frá Limbó, Stinger, bekkpressu og Pógó/Kóngi yfir í Skæri-Blað-Steinn.

Særún Björk Jónasdóttir, forseti SFHR, segir Ólympíuvikuna hafa gengið eins og í sögu og stemningin hafi verið frábær.

Þátttakan var ótrúlega góð hjá nemendahópnum. Öll hádegi vikunnar var keppt í alls konar þrautum og á miðvikudagskvöldinu var svo haldið stórt fótboltamót. Það tókst gríðarlega vel með flottu liði keppenda og miklum stuðningi frá áhorfendum. Sólin er búin að vera stútfull af HR-ingum öll hádegi og hefur því verið mikil stemning í kringum keppnirnar. Allar deildir hafa lagt sitt af mörkum, keppnisskapið hefur verið mikið og baráttan í ár sérstaklega hörð. 

Særún segir ljóst að allir hafa notið þess bæði að taka þátt og fylgjast með sem sé einmitt það sem geri Ólympíuvikuna svo skemmtilega og eftirminnilega.