Sigurlið Vitans í ár er Laxarnir

Sigurvegari Vitans í á er liðið Laxarnir sem samanstendur af þeim Thelmu Rún Eðvaldsdóttur, Sólveigu Sigurðardóttur, Lísu Ólafsdóttur, Jönu Ebenezersdóttur og Hrafni Ingi Agnarssyni. Þau stunda öll nám í BSc í rekstrarverkfræði.

Vitinn er samstarfsverkefni Háskólans í Reykjavík og Samtaka fyrirtækja í sjávarútvegi og hefur verið haldinn árlega síðan árið 2015. Að þessu sinni var keppnin unnin í samstarfi við Iðunn Seafoods, aðildarfélag SFS, og kom það í hlut Valdimars Sigurðssonar, prófessors í viðskipta- og hagfræðideild, að útfæra áskorunina og skrifa verkefnið.

Í ár bar áskorunin heitið; Reeling in a New Generation: Building Iðunn Seafoods' Brand for Young American Consumers. Var hópunum falið að leggja til umbætur á markaðssetningu Iðunn Seafood á ferskri þorsklifur til yngri og breiðari markhópa í Bandaríkjunum. Þrátt fyrir marga kosti vörunnar fólst áskorunin í þáttum líkt og áferð og lykt af lifur, takmarkaðri markaðsvitund, strangri samkeppni og framboðstakmörkunum. Þá kallar sú staðreynd að niðursuðuvörur séu taldar minna ferskar, eða úr ódýrari gæðaflokki, á nýstárlega vörumerkjastefnu.

Dómnefndina skipuðu, Dr. Bryndís Björk Ásgeirsdóttir, sviðsforseti samfélagssviðs HR, Erin Sawyer, sendiherra Bandaríkjanna á Íslandi, Valdimar Sigurðsson, prófessor í viðskipta- og hagfræðideild, Dagur Arnarsson, rekstrarstjóri Iðunn Seafoods, Haraldur Haraldsson, sölu- og markaðsstjóri Icelandir Cargo og Birta Karen Tryggvadóttir, hagfræðingur hjá Samtökum fyrirtækja í sjávarútvegi.

Valdimar segir hópana sem kepptu í Vitanum í ár hafa verið með margar góðar hugmyndir og raunhæfar tillögur.

Það reyndist okkur erfitt að tilnefna einn hóp sem sigurvegara. En hópurinn sem sigraði stóð sig frábærlega með lausn sem sameinaði frumleika, skemmtilegar hugmyndir og sterkar markaðsnálganir. Lausnir hópsins höfðuðu mikið til samstarfsfyrirtækisins.

Á fimmtudeginum 23 janúar fór fram opnunarhátíð Vitans. Það var Dr. Bryndís Björk Ásgeirsdóttir, sviðsforseti samfélagssviðs, sem setti hátíðina en að því að loknu tóku við erindi frá Heiðrúnu Lind Marteinsdóttur, framkvæmdastjóra hjá Samtökum fyrirtækja í sjávarútvegi, Josh Bull Political and Economic Deputy hjá bandaríska sendiráðinu, og Haraldi Haraldssyni, frá Icelandair Cargo. Þá fór Valdimar yfir áskorunina og í kjölfarið kynnti Dagur Arnarsson, rekstrarstjóri Iðunn Seafoods, fyrirtækið og hvernig verkefnið tengist starfssemi þess.

Á laugardeginum kynntu liðin verkefnin sín en metþátttaka var í keppninni í ár og alls níu lið skráð til leiks með samtals 39 nemendum. Nemendurnir stunda nám meðal annars við verkfræði, viðskiptafræði, tölvunarfræði og lögfræði. Keppnin er opin öllum nemendum HR, þvert á deildir og bæði grunnnáms- og meistarnema.

Sigurliðið fer fyrir hönd HR á sjávarútvegssýninguna Seafood Expo North America í Boston.
Auk þess heimsækja þau samstarfsháskóla HR, MIT og University of Southern Maine auk fyrirtækja og sjávarklasa á svæðinu. Bandaríska sendiráðið og Icelandair Cargo eru bakhjarlar keppninnar og styrkja annas vegar ferðalag nemenda í Boston og hins vegar flugið til Boston.

Vitinn var haldinn í 10. sinn í febrúar 2024 og unnu nemendur að þessu sinni áskorun með fyrirtækinu Ice Fresh Seafood. Vinningslið Vitans 2024 var „ BABYLON“.

Nemendur frá verkfræðideild og tölvunarfræðideild skipuðu sigurliðið „ BABYLON“ þetta árið. Liðið var samsett af þeim Oddi Óla Helgasyni, Bjarka Dan Andréssyni, Degi Má Oddsyni, Emil Erni Aðalsteinssyni og Sofiu Sóley Jónasdóttur. Verkefni þeirra fól í sér að útbúa markaðsáætlun fyrir Íslenska landbleikju á Bandarískum markaði sem selja átti í gegnum Whole Foods og til viðskiptavina þeirra í Bandaríkjunum. Hugmynd þeirra fólst í því að þróa markaðsáætlun í Bandaríkjunum fyrir svokallaðar „íslenskar perlur“. Þær yrðu markaðssettar sem bólgueyðandi matur fyrir atvinnuíþróttamenn vegna hás hlutfalls af Omega-3 fitsýrum í innihaldi fisksins, á stöðum þar sem Whole Foods býður upp á heimsendingu og þá í samstarfi við valda áhrifavalda.

Hópurinn var svo verðlaunaður með vel heppnaðri ferð til Boston þar sem þau fóru á eina af stærstu sjávarútvegssýningum í Norður- Ameríku, Seafood Expo North America. Auk þess ferðuðust þau til Portland, Maine með Ragnhildi Helgadóttur, rektor Háskólans í Reykjavík og forstöðumanni atvinnulífstengsla og nýsköpunar í HR. Þar heimsóttu þau Háskólann í Suður-Maine. Hópurinn heimsótti jafnframt sjávarklasa og fyrirtæki í sjávarútvegi þar sem þau fengu bæði góða innsýn inn í atvinnugreinina ásamt faglegri endurgjöf sérfræðinga í sjávarútvegi.

Nemendur frá verkfræðideild skipuðu sigurliðið „MAR“ þetta árið. Liðið var samsett af Birgittu Rós Ásgrímsdóttur, Jakobi Frey Sveinssyni, Hákoni Hákonarsyni, Sæþóri Orrasyni og Pedro Þóri Roismann Guðmundssyni. Verkefni þeirra fól í sér markaðsáætlun fyrir Íslensku síldina í Bandaríkjunum og koma fram með nýja vöru úr síld. Þau gerðu fjögurra ára markaðsáætlun, og markmið var að kynna íslenska hakkaða síld, Ómega-3 olíu unna úr síld, og fiskpróteinduft, sem þau kölluðu „Sjávarsilfur.“

Hópurinn fór svo í vel heppnaða ferð til Boston þar sem þau fóru á Seafood Expo North America sýninguna og heimsóttu fjölda bása fyrirtækja og kynntu hugmynd sína. Þau ferðuðust einnig til Portland, Maine með Ragnhildi Helgadóttur, rektor Háskólans í Reykjavík. Þar heimsóttu þau Háskólann í Suður-Maine. Hópurinn heimsótti sjávarklasa og fyrirtæki í sjávarútvegi þar sem þau fengu bæði góða innsýn inn í atvinnugreinina ásamt faglegri endurgjöf sérfræðinga í sjávarútvegi.

Hnakkaþon HR og SFS var haldið í fjórða sinn í janúar 2018 og unnu nemendur áskorun með útgerðarfyrirtækinu Brim.

Áskorunin

Áskorun Hnakkaþons 2018 snerist um hvernig Brim geti aukið sölu á ufsa til hótel- og veitingahúsakeðja í Bandaríkjunum.

• Áskorun Hnakkaþons 2018
• Dagskrá Hnakkaþons 2018

Vinningsliðið

Sigurliðið að þessu sinni kallaði sig Say Iceland og var skipað fimm nemendum úr lagadeild, viðskiptadeild og tækni– og verkfræðideild þeim Julie Robin de Niet, Serge Nengali Kumakamba, Sóley Meyer Sævarsdóttur, Tinnu Brá Sigurðardóttur og Yvonne Homoncik.

Í vinningstillögu hópsins var lagt til að leggja aukna áherslu á íslensk gæði, sjálfbærni og jafnt framboð allt árið um kring í markaðssetningu á ufsa á Bandaríkjamarkaði. Einnig lagði hópurinn til að Brim myndi þróa nýtt vörumerki, „Say Iceland“, og byggja upp aðstöðu til fullvinnslu í Portland í Maine í Bandaríkjunum, þar sem ufsinn verði marineraður, reyktur eða hjúpaður brauðraspi. Jafnframt lagði hópurinn sérstaka áherslu á markaðssetningu til mötuneyta í háskólum, hjúkrunarheimila og vinnustaða. Sem dæmi um stærð þess markaðar benda nemendurnir á að yfir ein milljón nemenda sækir háskóla í New York.

Hnakkaþon HR og SFS var haldið í þriðja sinn í janúar 2017. Nemendur unnu áskorun með útgerðarfyrirtækinu Vísi í Grindavík, Marel og prentsmiðjunni Odda en áherslan var á pökkun á ferskfiski. 

Áskorunin

Viðfangsefni keppninnar í þetta sinn var að setja fram ítarlegar tillögur um hvernig þróa mætti vinnslu og pökkun á fiski hjá Vísi þannig að enn betur væri mætt þörfum neytenda fyrir vandaðar og hentugar pakkningar, á sama tíma og fullt tillit væri tekið til bæði kostnaðar, sjálfbærni og umhverfisáhrifa. 

• Áskorun Hnakkaþons 2017  
• Dagskrá Hnakkaþons 2017 

Vinningsliðið

Sigurliðið var skipað nemendum í fjármálaverkfræði og viðskiptafræði, þeim Bjarka Þór Friðleifssyni, Fannari Erni Arnarssyni, Jóhannesi Hilmarssyni, Ómari Sindra Jóhannssyni og Sigurði Guðmundssyni. 

Vinningsliðið 2017

Vinningstillagan

Vinningstillagan, sem bar nafnið ,,Wild Icelandic Cod” fól í sér hugmynd að nýjum og umhverfisvænum neytendapakkningum fyrir íslenskan fisk á bandarískum markaði. Með þessum nýju umbúðum var lögð áhersla á ferksleika, gæði, umhverfisvernd, rekjanleika og sögu Vísis en einnig var að finna á umbúðunum einfaldar uppskriftir. Jafnframt voru umbúðirnar sérstaklega útbúnar fyrir ,,sous-vide” eldamennsku sem hefur verið að hasla sér völl undanfarið. 

Fjallað var um sigurtillöguna og ferðalag vinningsliðsins í Tímariti HR 2017 og er hægt að lesa greinina á vef HR: Sous-vide þorskur í umhverfisvænum umbúðum.

Áskorunin

Áskorun Hnakkaþonsins 2016 varðaði eitt mikilvægasta viðfangsefni samtímans, loftslagsmál, í kjölfar tímamótasamkomulags ríkja heims í París 2015. Verkefnið gekk út á að leggja fram lausnir sem auka umhverfisvernd og samkeppnishæfni sjávarútvegsfyrirtækisins Þorbjarnar hf. í Grindavík.  

• Áskorun Hnakkaþons 2016

Vinningsliðið

Sigurvegararnir voru fimm nemendur í véla- og orkutæknifræði, viðskiptafræði og lögfræði, Guðjón Smári Guðmundsson, Ingi Svavarsson, Hjálmar Óskarsson, Margrét Lilja Hjaltadóttir og Hrönn Vilhjálmsdóttir. 

Sigurtillagan gekk út á það hvernig Þorbjörn gæti aukið rafmangsnotkun á línubátum félagsins og togara, bæði á veiðum og við bryggju. Var það niðurstaða hópsins að kostnaður við búnað um borð í togara svo hann geti notað rafmagn úr landi í stað ljósavélar, knúinnar með olíu, greiðist upp á hálfu öðru ári. Ávinningurinn er því bæði á hinu umhverfislega sviði og hinu efnahagslega. Ávinningurinn er því bæði á hinu umhverfislega sviði og hinu efnahagslega. Einnig lögðu þau til að Þorbjörn, yrði fyrsta sjávarútvegsfyrirtækið á Íslandi til að taka upp ISO14001 umhverfisstaðal.