Starfsnám

Útbúa þarf starfslýsingu þar sem starfinu/verkefninu er lýst og eftir atvikum, tilgreind ábyrgð, hæfni, ávinningur og hver sé umsjónarmaður innan fyrirtækis eða stofnunar. Verkefnið á að tengjast námi nemanda og vera gagnlegt fyrir faglega þróun viðkomandi. Verkefnið á jafnframt að vera krefjandi en á viðráðanlegu stigi, til að stuðla að námi og færniþróun. Góð starfslýsing er líklegri til að skila áhugasömum starfsnemum með rétta hæfni í starfið.  

Mismunandi er á meðal deilda hvenær á námstímanum nemendur sinna starfsnámi. Undir fyrirkomulag deilda er að finna upplýsingar um starfsnámið m.a. tímasetningu og tímalengd starfsnáms.  

Fyrirkomulag við val á starfsnema er með eftirfarandi hætti en það er ólíkt meðal deilda:  

• Nemandi hefur að eigin frumkvæðisjálfur samband við fyrirtæki/stofnun að eigin vali og óskar eftir starfsnámi: Iðn- og tæknifræðideild og íþróttafræðideild (meistaranám). Valkvætt hjá viðskipta- og hagfræðideild, verkfræðideild og tölvunarfræðideild. 
• Umsjónarkennari ákveður hvaða nemandi fer til hvers fyrirtækis/stofnunar: Sálfræðideild og íþróttafræðideild (grunnnám) 
• Nemandi sendir umsókn á umsjónarkennara og velur tvö til þrjú fyrirtæki. Umsjónarkennari velur hæfustu nemendur út frá námsframvindu auk þess sem sumar deildir skoða einkunnirog einkunnum og er þeim boðið að senda fyrirtæki/stofnun starfsumsókn og ferilskrá: Verkfræðideild, viðskipta- og hagfræðideild og tölvunarfræðideild.  
• Nemandi í ML námi skilar inn umsókn um starfsnám með 1. val og 2. val um starfsnámsstað. Námsráð lagadeildar fer yfir umsóknir og samþykkir starfsnám sbr. 14. gr. reglna um meistaranám og raðar nemendum niður á starfsnámsstaði: Lagadeild 
• Fyrirtæki auglýsir eftir starfsnema hjá HR (birtist á Canvas). Umsjónarkennari tekur á móti umsóknum nemenda og sendir á fyrirtæki sem velja starfsnema. 

Við mat á umsóknum nemanda, sbr. liður b og c skal deildin taka til greina almennar óskir fyrirtækis/stofnunar um bakgrunn og hæfni nemanda. HR er ekki skylt að útvega fyrirtæki/stofnun nemendur í starfsnám eða að verða við óskum þess um tiltekna nemendur í starfsnám.  Nemandi getur öllu jöfnu ekki fengið samþykkt starfsnám hjá fyrirtæki/stofnun sem hann hefur unnið hjá áður. 

Við upphaf starfsnáms skal fyrirtækið/stofnunin tilnefna umsjónarmann/leiðbeinanda/handleiðara/verknámskennara (hér eftir umsjónarmaður). Hlutverk umsjónarmanns er ekki eingöngu að hafa umsjón og eftirlit með vinnu/verkefni starfsnema heldur einnig að tryggja að starfsneminn öðlist innsýn, skilning og færni með starfinu og að starfsnámið sé gagnlegt báðum aðilum.  

Hlutverk umsjónarmanns, er m.a. að:  

• Skilgreina umfang og markmið með vinnu starfsnema. 
• Setur niður væntingar fyrirtækis/stofnunar til starfsnema hvað varðar ábyrgð og frammistöðu. 
• Sjá til þess að starfsnemi fái almenna kynningu á fyrirtæki/stofnun; m.a. stefnu, skipuriti, verkefnum, starfsmönnum, menningu, gæðakröfum, öryggisreglum og aðstöðu. 
• Þjálfa starfsnema t.d. á tæki/búnað eða til að sinna sérstökum verkefnum. 
• Tryggja að nemandinn hafi aðgang að nauðsynlegum auðlindum, t.d. kerfum, aðstöðu, tækjum, starfsmönnum, til að sinna verkefninu. 
• Vera starfsnema til ráðgjafar og aðstoða við þróun færni og þekkingaröflun. 
• Deila reynslu og þekkingu með starfsnema til að auka þann lærdóm sem starfsneminn fær út úr starfsnáminu. 
• Fylgjast með framvindu vinnu/verkefnis og veita uppbyggilega endurgjöf sem tekur til þess sem þarf að bæta. 
• Hjálpa starfsnema að aðlagast teymi og menningu, og hvetja til tengslamyndunar. 
• Leyfa starfsnema að sitja fundi, þar sem við á. 
• Hvetja starfsnema áfram til góðra verka og vekja áhuga á fagsviðinu. 
• Funda með umsjónarkennara og starfsnema, ef krafa er um slíkt.  
• Meta formlega framlag/vinnu starfsnema í samráði við umsjónarkennara við lok starfsnáms. 

Framangreint gefur vísbendingu um hlutverk umsjónarmanna en hlutverkið er ólíkt milli deilda og eftir eðli starfsnáms.  

Deildir gera samning vegna starfsnáms við atvinnulífið. Fyrirtæki/stofnun er heimilt að gera aðra samninga við starfsnema, t.d. varðandi trúnaðarskyldu og hugverkarétt. 

Starfsnám er ólaunað, sjá undantekningu undir fyrirkomulag deilda. 

Í meistaranámi er boðið upp á starfsnám sem er 7,5 ECTS valnámskeið (kennsluskrá: Starfsnám) á haust- og vorönn.  

Miða skal við að 7,5 ECTS jafngildi viðveru á vinnustað í 150 vinnustundir, þar sem nemandi vinnur að lögfræðilegum verkefnum sem eru sannanlega til þess fallin að auka þekkingu nemandans í lögfræði og hæfni til að vinna að úrlausn lögfræðilegra verkefna. Rétt er að dreifa starfsnáminu á 4-8 vikur og skal því lokið eigi síðar en síðasta prófdag á þeirri önn sem starfsnámið fer fram. 

Nemandi skilar inn umsókn um starfsnám með 1. val og 2. val um starfsnámsstað. Námsráð lagadeildar fer yfir umsóknir og samþykkir starfsnám sbr. 14. gr. reglna um meistaranám og að uppfylltum skilyrðum þess að komast í starfsnám og raðar nemendum niður á starfsnámsstaði. 

Nemandi getur ekki fengið samþykkt starfsnám hjá fyrirtæki eða stofnun sem hann hefur unnið hjá við lögfræðistörf. Ef umsókn nemanda um starfsnám er samþykkt telst það val bindandi fyrir nemandann. Reglur um heimild nemenda til að breyta námskeiðsvali fyrstu viku skólaannar á ekki við um starfsnám. 

Umsjónarkennari úr hópi fastra kennara heldur utan um samskipti við samstarfsaðila og sér til þess að starfsnámsstaður sem samþykktur hefur verið að taka nemanda i starfsnám tilnefni umsjónarmann með nemanda í starfnámi. Umsjónarmaður skal hafa eftirlit með störfum nemanda í starfsnámi og sjái til þess að nemandi fái verkefni við hæfi. Umsjónarkennari kemur einnig á fundi með nemanda og umsjónarmanni í fyrstu kennsluviku og áður en starfsnám hefst þar sem farið er yfir verkefni nemanda, vinnutíma, vinnuaðstöðu, námsmat og önnur atriði sem varða fyrirkomulag starfsnámsins.  

Við lok starfsnáms skal nemandi skila vinnuskýrslu um starfsnámið þar sem fram kemur lýsing á verkefnum nemenda. Umsjónarmaður starfsnáms hjá fyrirtæki/stofnun staðfestir vinnuskýrsluna og gefur umsögn um frammistöðu nemanda. Umsjónarkennari metur, á grundvelli staðfestrar vinnuskýrslu og umsagnar umsjónarmanns, hvort nemandi hafi lokið áætluðum námseiningum með fullnægjandi árangri.  

Starfsnámið skal vera ólaunað.